ရှင်သန်ခြင်း အနုပညာ

( ၁ )

နံရံတစ်ခုရှိပါသည်။ ထိုနံရံသည် တစ်ခါတရံနီးလာလိုက်၊ တစ်ခါတရံဝေးသွားလိုက်။ ထိုနံရံနီးကပ်လာလျှင် အေးစက်ခြောက်ခြားသော ခံစားမှုတို့ လွှမ်းခြုံ၍၊ ထိုနံရံဝေးကွာ သွားလျှင်မူ ၎င်းနေရာသို့ရောက်ရန် မရပ်မနားရုန်းကန်ရပြန်ပါသည်။ လမ်းခရီးတို့သည် မညီမညာကြမ်းတမ်းလိုက်၊ သက်တောင့်သက်သာချော့မွေ့လိုက်ဖြင့်လူးလွန့်ကာရှင်သန်ရင်းနံရံတွေဆီသို့သာတရွေ့ရွေ့တိုးကပ်လာနေရပါသည်။ မရောက်ခင်မှာ လက်မှိုင်မချစတမ်း ကိုယ့်အားအင်နှင့် ကိုယ် အလှပဆုံးရှင်သန်နိုင်အောင်လည်း ကြိုးစားအားထုတ်ကြသည်။ပြိုလဲရာတွေ ရှိနေပါစေ၊ ကျရှုံးမှုတွေ ရှိနေပါစေ ဘ၀ဟူသောစက်ဝန်းတစ်ခုကို အနားသတ်ညီညာအောင် ပုံဖော်ကြသည်။ ထိုအရာသည် လှပသော အနုပညာတစ်ရပ်ဖြစ်သည်။ ထိုအရာသည် ရပ်တည်ရှင်သန်ခြင်း၏ သိမ်မွေ့နူးညံ့မှု။

ထိုအခြင်းအရာသည် “ရှင်သန်ခြင်း အနုပညာ” ဖြစ်ပါသည်။

*********************************

( ၂  )

လူတိုင်းလူတိုင်း ဘ၀မှာ မုန်တိုင်းတွေတော့ ကြုံခဲ့ဖူးသည်ပင်။ ဘ၀မုန်တိုင်းတွေကြားမှာ ရုန်းရင်းကန်ရင်း အနိုင် ရခဲ့ဖူးတာ ရှိသလို၊ ဒဏ်ရာဒဏ်ချက်တွေလည်း ရခဲ့ဖူးမှာပင်။ မည်သို့ဖြစ်စေ ကျွန်မတို့ လူသားများသည် ဇွဲမလျော့ခဲ့ကြပါ။ အသက် ရှင်သန်ရန်အတွက်၊ ရပ်တည်နေရသော ဘ၀မပြိုလဲရန်အတွက် အမျိုးမျိုး အဖုံဖုံတော့ ကြိုးစားနေဆဲပင်။ သို့သော် တစ်ခါ တရံတော့လည်း အဖြေမသိသော မေးခွန်းများကြား မွန်းကြပ်လှောင်ပိတ်မိပါသည်။

တစ်ရံရောအခါက အမေးစကားကို ကြားယောင်မိသလိုလို။

“နားချင်ပြီ….. ဘာအတွက် ရှင်သန်နေရတာလဲ”

မဟုတ်ဘူး……ရင်ထဲမှလျင်လျင်မြန်မြန်ငြင်းဆန်နေသော်လည်းနှုတ်ဖျားမှ မည်သည့်အဖြေစကားမှတော့ ထွက်ကျ မလာခဲ့။

“ဘာအတွက် ရှင်သန်နေရတာလဲ” တဲ့။

ရှင်သန်ခြင်း၏ အဓိပ္ပာယ်ကို ဖြေရှင်းမရသော အခက်အခဲများနှင့် ကြုံတိုင်း၊ ၀မ်းနည်းအားငယ်မှုတို့နှင့် ကြုံတိုင်း မကြာ ခဏတွေးခဲ့မိပါသည်။နေ့စဉ်ပြုမြဲ စားသောက်ခြင်း၊ အိပ်စက်ခြင်း၊ လုပ်ငန်းဆောင်တာဆောင်ရွက်ခြင်းတို့ကိုပင် စိတ်ပျက် လာသည်အထိ ရှင်သန်ခြင်းကို ငြီးငွေ့ခဲ့ဖူးပါသည်။ သို့ပေမယ့် ထိုရှင်သန်ခြင်းကို ရပ်တန့်ပစ်လောက်သည်အထိ တော့ ကျွန်မ မ၀ံ့စားသေးပါ (တစ်နည်းမဟုတ်) မမိုက်မဲမိသေးပါ။ ဒါဟာ ရူးသွပ်မှု တစ်ရပ်၊ ကြံ့ကြံ့မခံနိုင်သေးသူတို့၏ အဆုံး သတ်ခြင်းတစ်ခုသာ ဖြစ်ပါသည်။

ဘ၀တွင်ငွေအတွက်၊ စားဝတ်နေရေးအတွက်၊ အလုပ်အတွက်၊ အချစ်အတွက် မောပန်း၍ ရှုံးနိမ့်ခဲ့သူတွေ ဘယ် နှစ်ယောက်တောင်ရှိခဲ့ပြီလဲ။ မည်သူတွေသည် လူမှုဝန်းကျင်၏ ဒဏ်ရာဒဏ်ချက်တွေကြောင့် နာကျင်ကြေကွဲခဲ့ရပြီလဲ။လာက၏ လှိုင်းတံပိုးများအကြောင်း တွေးမိသော ကျွန်မ မျက်ဝန်းဝယ် မျက်ရည်တော့ ဝေ့မိသည်ထင်သည်။ ကျွန်မ မောပန်းနေခဲ့လေပြီလား။ ကျွန်မ လက်မြှောက်အရှုံးပေးချင်ခဲ့လေပြီလား။ ကျွန်မ ရပ်   တန့်   ချင်    ပြီ    လား  ။

ခပ်သွက်သွက် ခေါင်းခါယမ်းမိ၍ ဝေ့နေသည့် မျက်ရည်စက ပါးပြင်ပေါ် ဖျတ်ကနဲ ကျသည်။

*********************************

( ၃ )

သံသယပေါင်းများစွာ၊ အထင်လွဲမှုများစွာ ကြုံတွေ့ခဲ့ဖူးပါသည်။ “အမှန်တရားသည် တစ်ခါတရံ အဆိပ်တစ်ခွက် ဖြစ်ခဲ့လေ သည်လား”။ ဖြေရှင်းရန် မလိုသော၊ ဖြေရှင်းခွင့်မကြုံသော ကိစ္စရပ်များတွင် အသာအယာခေါင်းယမ်းနေရုံမှလွဲ၍ လုပ်စရာ အခြားမရှိခဲ့ပါ။ ကိုယ် လျှောက်သောလမ်းသည် မှန်ကန်သည်လား၊ ယိမ်းယိုင်သည်လား…..မည်သို့ဖြစ်စေ မယုတ်ညံ့ခဲ့တာ တော့ သေချာသည်။

ကြိုတင်ကြံစည်၍ မလိမ်ညာဖူးခဲ့တာ မှန်သည်။ ကြိုတင်ကြံစည်၍ သူတစ်ပါးချစ်ခြင်းမခွဲခဲ့ဖူးတာ မှန်သည်။ ကံစီမံရာအတိုင်း အလျားသင့်ဖြစ်တည်စီးမျောရင်းမှ ဘယ်သောင်ဘယ်ကမ်းဆိုက်ရမည်မှန်း မသိအောင် ရှင်သန်ခြင်း ၀ဲကယက်တွင်း တ၀ဲလည်လည်။

“ငြိမ်းချမ်းရာသည် မိမိကိုယ်တွင်းမှာသာရှိ” သတဲ့။

ထိုငြိမ်းချမ်းမှုကို အမိအရဖမ်းဆုပ်ဖို့ ကျွန်မ ကြိုးပမ်းခဲ့ပါသည်။ သို့သော် ထိလွယ်ရှလွယ်သော၊ ဆူညံသံတစ်ခု ကြားရလျှင်ပင် တုန်လှုပ်တတ်သောစိတ်ကို ပိုင်ဆိုင်ထားသည့် ကျွန်မအတွက် ခက်ခဲလေးလံခဲ့ပါသည်။ သံယောဇဉ်ဟူ သည် ရစ်ပတ် နှောင်ဖွဲ့တတ်သော ကြိုးတွေဖြစ်လေသလား။ဒေါသ၊ အတ္တ၊ မာန်မာနတွေသည် ကိုယ်ခန္ဓာကို တမြေ့မြေ့ လောင်မြိုက်စေတတ်သလား။ ချစ်ခြင်းမေတ္တာတရား၌ အကြိမ်ကြိမ်ကျရှုံးခဲ့တတ်ခြင်းသည်လည်း မိမိကိုယ်ကို ယုံကြည်မှု စွမ်းအင်တွေ နည်းပါးစေတတ်ပြန်ပါသည်။

လူတစ်ဦးနှင့် တစ်ဦး နှောင်ဖွဲ့မှုများကြား၌ မည်သည့်အရာတွေ ရှိနေနိုင်ပါသည်လဲ။ မေတ္တာတရား၊ ယုံကြည်မှု၊ နားလည်မှု စသည့်အရာများဖြစ်နိုင်သလို အမုန်းတရား၊ စက်ဆုပ်မှု စသဖြင့်လည်း ရှိနေနိုင်ပါသည်။ ချစ်ခြင်းနှင့် နှောင်ဖွဲ့ ကြသလို မုန်းခြင်းဖြင့်လည်း နှောင်ဖွဲ့ကြသော လူ့အသိုင်းအ၀ိုင်းကို စေ့စေ့ကြည့်ရန် အားအင်တွေ ကုန်ခန်းလှပြီ။

ကဗျာတစ်ပုဒ်ရေးခဲ့ဖူးပါသည်။

“မပြည့်သောအိုး

ပြည့်သောအိုးများရဲ့

လျှံကျနေသော အတ္တပုံဆောင်ခဲများ”

ဓားသွားထက် ကလောင်သွားထက်သတဲ့။ ကလောင်ကိုင်တိုင်းလည်းဖြူစင်သန့်ရှင်းနေရန် မကြိမ်းသေလှပါ။ ပြည့်သောအိုးဖြစ်စေ၊ မပြည့်သောအိုးဖြစ်စေ လူသားဟူ၍ ဖြစ်တည်နေသရွေ့ “ငါ” ဟူသည်ကတော့ လျှံကျနေမြဲပင်။

“ငါ့မိဘ

ငါ့သားသမီး                                                                                                                                                                                

ငါ့သူငယ်ချင်း                                                                                                                                                                                                                               

ငါ့ချစ်သူ                                                                                                                                                                      

ငါ……….

ငါ…”

ဘာကိုမှ မသေချာ၊ မရေရာသည့် သံသရာဝယ် ဘယ်အရာတွေကိုများ ပိုင်ဆိုင်လိုမှု၊ ပြိုင်ဆိုင်လိုမှု၊ ရယူလိုမှု၊ မဆုံးရှုံးချင်မှု၊ ပျက်စီးစေလိုစိတ်…..စသဖြင့် ခိုင်မြဲနေကြပါလိမ့်။ကောင်းကင်ကိုမော့ကြည့်မိတော့ မိုးသားတိမ်လိပ်တွေ အလုအယက် တွန်းတိုက်ရွေ့လျားနေတာတွေ့ရသည်။ ဘယ်နေရာကိုများ ဦးတည်ရွေ့လျားနေကြသည်လဲ။ ကောင်းကင် ဟာကောင်းကင်ပဲ မဟုတ်လား။ သည်လိုပဲ ကျွန်မတို့ လူသားတွေဟာ တရွေ့ရွေ့သွားလာနေကြရတာပဲ။ ဘ၀ တလျှောက် လုံးလေ…..။ မမောနိုင်၊ မပန်းနိုင်။ တစ်နေ့မှာတော့ မိုးစက်မိုးပေါက်တွေအဖြစ် ကမ္ဘာမြေပေါ် သက်ဆင်းရတာပင်။ အတွန်း အတိုက်၊ အလဲလဲ အပြိုပြို။လေအသော့အနော့များကြားဝယ် အရောင်အသွေးစုံလင်သော တိမ်တွေက ပုံစံအမျိုးမျိုး။မြင့်သထက်မြင့်အောင် (သို့မဟုတ်) တိမ်အဖြစ် ရှိနေစဉ်အခိုက် လှပသေသပ်အောင် ဖော်ဆောင် နေကြသည်။

သေးသေးမွှားမွှားပိုင်ဆိုင်မှုတွေကို လက်လွှတ်ဆုံးရှုံးခဲ့ရတာ များခဲ့ပြီ။ ကြီးကြီးမားမားပိုင်ဆိုင်မှု ဟူသည်ကတော့ အိပ်မက် ထဲတောင်ယောင်ယမ်းအလည်ရောက်မလာပါ။ သက်တမ်းတော့ ဘ၀တစ်ဆစ်ချိုးခဲ့ပြီ။ အချိန်တွေ နောက်ပြန် လှည့်ကြည့် တော့ တဖျပ်ဖျပ်။ ကျွန်မ ရှေ့ရှိ နံရံက ကျွန်မနှင့် ပိုနီးကပ်လာသလိုပင်။ သံသရာအတွက် ကျွန်မ ဘာတွေပြင်ဆင်ပြီးပြီလဲ။ ရှင်သန်ခြင်းသည် အဓိပ္ဓာယ်ပြည့်ဝနေဖို့တော့ လိုပါသည်။

တစ်နေ့က တီဗွီသတင်းထဲတွင် မီးတောင်ပေါက်ကွဲရာမှချော်ရည်တွေပန်းထွက်သည့် အကြောင်းမြင်တွေ့ လိုက်ရသည်။ချော်ရည်အပူရှိန်ကြောင့် ထိစပ်ပတ်သတ်ရာ နယ်မြေဒေသများကို တမဟုတ်ချင်းလောင်ကျွမ်းသွားစေ သည်။ သတင်း မှတ်တမ်း ကလည်း အမိအရသေချာရိုက်ကူးထားရာ ကမ္ဘာပျက်သလိုဖြစ်နေသည့် မီးလျှံလုံးများ၊ လောင်ကျွမ်းမှုများ၊ သမုဒ္ဒရာထဲသို့ မီးလျှံများ အထွေးလိုက် လိမ့်ဆင်းသွားပုံများကိုမြင်တွေ့ခဲ့ရသည်။ သတင်းတင်ဆက် သူက အပျက်အစီး၊ အဆုံးအရှုံး အသေအပျောက် မည်ရွေ့မည်မျှ စာရင်းပြုစု ကြေညာနေသော်လည်း ကျွန်မ မကြားမိတော့ပါ။ သည်လို ကမ္ဘာ မြေကြီး အတွင်းပိုင်းမှာ လှိုက်၍ လှိုက်၍ ပူလောင်မှုတွေကော မည်မျှ များနေခဲ့မည်လဲ။ လူတွေ၏ လောဘ၊ ဒေါသ၊ မာန်မာန၊ မောဟ အပူမီးတွေကြောင့်များ ရှုင်သန်နေထိုင်ရာ ကမ္ဘာမြေကြီး ပူလောင်လာလေရော့သလား။ သည်လိုဖြင့် ရှင်သန်ခြင်းသည် အရုပ်ဆိုးအကျည်းတန်များ နေလေမလား။

*********************************

(၄)

သဘာဝတရားသည် သစ်လွင်တောက်ပမှုများ ရှိလာသလို၊ ပျက်စီးယိုယွင်းမှုများလည်း ရှိလာသည်။ လူတို့ဖန်တီး၍ဖြစ်စေ၊ အချိန်ကာလကြောင့်ဖြစ်စေ ယိုယွင်းမှုကတော့ ပိုများလာမည်ထင်သည်။ သဘာဝဘေးအန္တရာယ်တွေ၊ လူသားအချင်းချင်းကြောင့်ဖြစ်သော ဘေးအန္တရာယ်တွေ ခပ်စိပ်စိပ်ဖြစ်လာသည်တွင်ရှင်သန်ခြင်း၏ အဓိပ္ပာယ်က ပိုမိုလေးနက်လာသည်။ ပြန်လည်တည့်မတ်ခြင်းတွေ၊ ဖေးမကူညီခြင်းတွေ၊ ပေါင်းစည်းဖော်ဆောင်ခြင်းတွေဖြင့် လူသားအသိုက်အမြုံသည် ရင်းနှီး နွေးထွေးလာသည်။ ထိုအချိန်၌ ရှင်သန်ခြင်းသည် သိမ်မွေ့နူးညံ့ကာ လှပလှသည်။

ပြင်သစ်ဘာသာပြန်စာအုပ်တစ်အုပ်မှ Le Petit Prince ကို သတိရမိသည်။ `လူတွေဟာ သူတို့အမြန်ရထားနဲ့သာ ခရီး သွားနေကြတယ်။ သူတို့ ဘာကိုရှာဖွေနေတယ်ဆိုတာ သူတို့ဟာသူတို့ မသိကြဘူး။´ မင်းသားလေးပြောခဲ့သော စကား ဖြစ်ပါသည်။ အဆောတလျင် ဟိုပြေးသည်ပြေးနဲ့ အလျင်လည်း လိုနေကြသတဲ့။ ကျွန်မတို့သည် ကိုယ့်ရထား ကိုယ်စီးနင်း ကာ ဘယ်ဆီတွေသွားနေကြမှန်းမသိ။ ဘယ်ဆီရောက်မည်လည်း မသေချာ။ ဒီကြားထဲ အလျင်လိုနေ ကြသေးသည်။ ဘာအတွက် စိတ်စောနေကြသလဲ။ ဘယ်အချိန်မှာ ဘယ်နေရာကိုများ ရောက်ချင်နေကြသည်လဲ။ တကယ်တော့ ဘယ်ဆီ ဆိုတာ သတ်မှတ်နိုင်လျှင် ဘယ်အချိန်ဆိုသည်မှာ သိပ်အရေးမကြီးလှပါ။ ရှင်သန်ခြင်းဟူသော အပိုင်းအခြားသည် ဘာကို ရှာဖွေနေတယ်ဆိုတာကောင်းစွာသိမြင်နိုင်ရန် အသေချာဆုံးကာလဖြစ်သည်။ သဘာဝတရားကပေးသော ရှင်သန်ခွင့်ကို အဓိပ္ပာယ်ရှိရှိ အသုံးချနိုင်ဖို့သာလိုပါသည်။

ဖြစ်တည်နေကြသော ဘ၀အခြေအနေများ၊ ကံစီမံရာပုံချခြင်းခံခဲ့ရပါသော အိပ်မက်အင်္သချေများ၊ ခေါက်သိမ်းခဲ့ရသော လိုအင်ဆန္ဒများ၊ ထပ်တူကျခြင်း မကျခြင်းရှိနေကြပါသော ပန်းတိုင်များ…..သည်အရာတွေက လူတွေကို ရှင်သန်ရန်ငြီးငွေ့စေသည်။ `ဘ၀ဆိုတာဘာလဲ´ရေရွတ်မြည်တမ်းကြသည်။ ဆန္ဒနှင့်ဘ၀ထပ်တူကျသူတွေက `ဘ၀ဟာတိုတိုလေး´ ဆိုကြသလို၊ ဆန္ဒနှင့်ဘ၀ပြောင်းပြန်အချိုးကျသူတွေက `ဘ၀ဟာ မပြီးဆုံးနိုင်သော ခရီးရှည်´ ဟုညည်းညူကြသည်။ တကယ်တော့ ဘ၀ဟူသည် သူ့အချိန် ကာလနှင့်သူ တည်ရှိပြီးသားပင်။ သဘာဝတရားက `ရှင်သန်ခွင့်´ ဟူသော ဆုလာဘ်ကို လူသားအားလုံးကို ညီတူညီမျှ ပေးစွမ်းထားလေသည်။

ရှင်သန်ခွင့်ဟူသော စက်ဝန်းထဲရောက်ရှိနေသရွေ့ အစွမ်းကုန်လန်းဆန်းနိုင်ခွင့်သည် ကျွန်မတို့ လက်ထဲမှာပင်ရှိသည်။ပြိုလဲရာတို့မှပြန်လည်ထူမတ်ရန်သည် ကျွန်မတို့လက်ထဲမှာပင် ရှိသည်။ ဘ၀သည်ဖြစ်တည်မှုတစ်ခုသာ ဆိုလျှင် ထိုဖြစ်တည်မှုကို အဓိပ္ပာယ်ရှိရှိလှပအောင် ကျွန်မတို့ဖော်ဆောင်နိုင်ပါသည်။

*********************************

(၅)

ကျွန်မတို့တွေ လမ်းတစ်ခုပေါ် တရွေ့ရွေ့သွားလာနေကြသည်။ မဖြောင့်တန်းသော လမ်းအသွယ်သွယ် တို့ဖြစ်၍ အဆုံးအစ မသိအောင်ကွေ့ဝိုက်ဝင်္ကဘာဆန်လွန်းလှသည်။ သာယာသော မြင်ကွင်းတွေတွေ့လိုက်၊ ချုံနွယ်ပိတ်ပေါင်းတွေတွေ့လိုက်၊ မိုးသည်းထန်လိုက်၊ နေသာလိုက်ဖြင့် လမ်းတွေပေါ် ခရီးနှင်နေကြရသည်။ ခရီးတစ်ခုကို အဓိပ္ပာယ်ရှိရှိ လှပစေရန် ကျွန်မတို့ပြုပြင်ဖန်တီး၍ ရသည်။ ပြိုလဲမှုများစွာတို့မှလည်း ပြန်လည်တည့်မတ်ရှင်သန်စေရန် ကျွန်မတို့ ကြိုးပမ်းနိုင်ပါ သည်။ ကျွန်မတို့ရှင်သန်နေသောအခိုက်၊ ကျွန်မတို့အသက်ရှုနေသော အခိုက် ထိုအခိုက်အတန့်ကို သိမ်မွေ့လှ့အောင် ပုံဖော်နိုင်ပါသည်။ ဘ၀ဟူသည် တံခါးများဖြင့် ဖွဲ့စည်းထားသည် ဆိုပါစို့။ ထိုတံခါးများကို သံကြိုးအထပ်ထပ်တို့ဖြင့် ပိတ်လှောင်မွန်းကြပ်နေရန် မလိုအပ်လှပါ။ ကျွန်မတို့၏ တချို့တံခါးများကို စေ့ရုံစေ့ထားကာ၊ တချို့တံခါးများကို ဟင်းလင်း ဖွင့်ထားလိုက်ပါ။ အလင်းရောင်ကို ကျွန်မတို့ခံစားကြရမည်။လေပြေလေညင်းကို ကျွန်မတို့ခံစားကြရမည်။ ထို့အပြင် ကျွန်မတို့ ရှာဖွေနေသော အရာကိုပါ တဖြေးဖြေးသိမြင်လာပါမည်။ ထိုအရာသည် လှပသော အနုပညာတစ်ရပ်ဖြစ်သည်။ ထိုအရာသည် ရပ်တည်ရှင်သန်ခြင်း။ သိမ်မွေ့နူးညံ့မှု။ ထိုအခြင်းအရာသည် `ရှင်သန်ခြင်း အနုပညာ´ ဖြစ်ပါသည်။     ။

ရွှေအိမ်စည်

10.1.2013

PM: 10:25

အယ်ဒီတာ မှတ်ချက်

ရှင်သန်ခြင်း အနုပညာ ကိုိရေးသားသူ ဆရာမ ရွှေအိမ်စည်သည် လွန်ခဲ့တဲ့ ၂၀၀၀ ခုနှစ်ထဲက စာပေလောကထဲရောက်ရှိလာသူဖြစ်ပြီး ၂၀၀၁၊ ၂၀၀၂ ခုနှစ်တွေမှာရွှေအသစ်ကဏ္ဍများမှာ နှစ်ကြိမ်ဖော်ပြခံရသူဖြစ်ပါသည်။ ၂၀၀၁ ခုနှစ် သြဂုတ်လရွှေအမြုတေမဂ္ဂဇင်းရဲ့ ရွှေအသစ်ကဏ္ဍမှာ “အလင်းနှင့်အမှောင်”၊ ၂၀၀၂ ခုနှစ် ဧပြီလရွှေအမြုတေမဂ္ဂဇင်းရဲ့ ရွှေအသစ်ကဏ္ဍမှာ “အနှောင်အဖွဲ့အလွမ်းပြဇာတ်” တို့ကို ပုံနှိပ်ဖော်ပြခံခဲ့ရသည်။

၂၀၀၈ ခုနှစ်မှာ မောင်ကမ္ဘာစာပေကထုတ်ဝေတဲ့ “ရွေအသစ်ရဲ့ ရွှေစုများ” ရယ်လို့ စာအုပ်ထုတ်ဝေပေးတဲ့အခါမှာလည်း ဆရာမရေးသားခဲ့တဲ့ ၀တ္ထုတိုတစ်ပုဒ်ဖြစ်တဲ့ “အနှောင်အဖွဲ့အလွမ်းပြဇာတ်” ရွေးချယ်ဖော်ပြခြင်းခံခဲ့ရသည်။

အဲဒီ့နောက်ပိုင်း အွန်လိုင်းစာမျက်နှာတွေမှာ ၂၀၁၀ကအစပြုပြီး http://shweainsi.blogspot.com ဆိုတဲ့ blog တစ်ခုဖွင့်ပြီး စာပေတွေ ရေးသားခဲ့သူဖြစ်သည်။ ပုံနှိပ်စာမူ ၂၀ ကျော်လွန်ခဲ့တဲ့ အတွက် စာရေးသူရဲ့ ဇာတိဖြစ်တဲ့ ပုသိမ်မြို့နယ် စာနယ်ဇင်းကနေပါဝင်ခဲ့ပြီး၊ ကလောင်အမည်ရွှေအိမ်စည်အမည်ဖြင့် မြန်မာနိုင်ငံစာပေနှင့်စာနယ်ဇင်းတွင် မှတ်ပုံတင်ခဲ့ပြီး မြန်မာနိုင်ငံစာပေနှင့်စာနယ်ဇင်းမှ စာရေးဆရာအဖြစ်အသိအမှတ်ပြု ကဒ်လည်း ရရှိထားသူဖြစ်သည်။ ကလောင်အမည် ရွှေအိမ်စည်၊ စာနယ်ဇင်းအမှတ်မှာ ၇၂၆၂ ဖြစ်ပါသည်။

ရွှေအိမ်စည်အမည်ဖြင့် သောင်းပြောင်းထွေလာမဂ္ဂဇင်း (ယခင်)၊ န၀ဒေးမဂ္ဂဇင်း၊ အပျိုမ မဂ္ဂဇင်း၊ ချယ်ရီ မဂ္ဂဇင်း၊ Beauty မဂ္ဂဇင်း တို့မှာ ၀တ္တုတိုတွေ ရေးသားခဲ့သလို လက်ရှိ ရွှေဒေါင်းတောင်အွန်လိုင်း မဂ္ဂဇင်း အယ်ဒီတာအဖွဲ့ဝင်အဖြစ် တာဝန်ယူလုပ်ဆောင်ပေးနေပြီး စာပေလောကအကျိုးကို သယ်ပိုးထမ်းရွက်နေသူဖြစ်ပါသည်။

ယခု ဆရာမ ရွှေအိမ်စည်ရဲ့ စာပေကိုယ်ရေးအကျဉ်းကို ဖော်ပြတင်ပြပေးလိုက်တာက ရွှေအိမ်စည် ကလောင်အမည်တူတွေပေါ်ထွက်လာနေခြင်းနှင့် မှားယွင်းထင်မှတ်မူများရှိနေခြင်းကြောင့်  မလိုလားအပ်သည့် ပြသနာများမဖြစ်ပေါ်စေခြင်းနှင့် မှားယွင်းထင်မှတ်မူများ မဖြစ်ပေါ်စေရေးအတွက် အယ်ဒီတာမှတ်ချက်ဖြင့်ဖော်ပြပေးလိုက်ခြင်းဖြစ်သည်ကို စာဖတ်သူများ နားလည်ခွင့်လွတ်ပေးနိုင်ကြလိမ့်မည်ဟု မျှော်လင့်မိပါသည်။

ရွှေဒေါင်းတောင် အွန်လိုင်းမဂ္ဂဇင်း

တာဝန်ခံအယ်ဒီတာ