ရောင်စုံခဲတံလေးများ

ဘ၀မှာ ပျော်ရွှင်စရာတွေ သိပ်မရှိခဲ့ပါဘူး။ ရှိခဲ့တဲ့ပျော်ရွှင်စရာလေးတွေ ကိုလည်း သိပ်ပြီး မမှတ်မိခဲ့ဘူး။ သမားရိုးကျ ဖြတ်ရိုး ဖြတ်စဉ်အတိုင်းပဲ ဖြတ်သန်းကြီးပြင်းခဲ့ တယ်ဆိုပါတော့။

တစ်ခါတလေကျတော့လည်း ကိုယ်တိုင် တည်ဆောက်ခဲ့တဲ့ဘ၀ကို ကိုယ်တိုင် မကျေနပ်ချက် လေးတွေ ရှိနေ တတ်ခဲ့ပြီ... နေ့စဉ် ဖြတ်သန်းမှုတွေထဲက မပြေလည်မှု တစ်ခုကို စဉ်းစားနေတုန်း။

`` ဘာအရောင်ဖြည့်ရမလဲ ဖေဖေ´´

သမီးကြီးက  ကိုယ်တိုင်ကာလာသွင်းရတဲ့ ပုံဆွဲစက္ကူလေးတွေရယ်၊ပုံဆွဲတဲ့ ခဲတံလေးတွေကို ချထားရင်းက လှမ်းမေးလိုက်တယ်။

“ သမီးကြိုက်တဲ့ အရောင်ဖြည့်လိုက်သမီး”

“ကိုယ်ကြိုက်တဲ့ အရောင်ဖြည့်”

သမီးကြီးကိုလှမ်းပြောတော့သားကလည်း “သားသားရော....”တဲ့။

“သားလည်း ကြိုက်တဲ့ အရောင်ဖြည့်လိုက်လေ...”

“မမကိုကြည့်ပြီး ဖြည့်မယ်..” သားငယ်ကပြောလည်းပြော သူ့အစ်မပုံကို လည်း လှမ်းကြည့်လိုက်တယ်။

သူ့အစ်မက “ မဖြည့်နဲ့ မောင်လေး။ မောင်လေးကြိုက်တာဖြည့် မမအရောင်ကိုမောင်လေ ကြိုက်ချင် မှကြိုက်မှာ...”

သမီးနဲ့ သားကိုကြည့်ရင်း ကျွန်တော် နှုတ်ဆိတ်သွားမိတယ်။

ဟုတ်တာပေါ့။ သားငယ်ရဲ့ အယူအဆနဲ့သမီးကြီးရဲ့ စာနာစိတ်တွေက လောကကြီးအတွက် သိပ်အရေးကြီးတာပဲ....လို့။

သမီးနဲ့ သားကတော့ နှစ်သက်ရာ အရောင်လေးတွေနဲ့ ပုံလေးတွေကို ဖြည့်နေကြပြီ။ ကျွန်တော်အတွေးတွေအများကြီး ဖြန့်ကျက်ထားမိတယ်။ သားငယ်က သူမသိတော့အစ်မလုပ်တာကို ကြည့်မယ်တဲ့..၊ သမီးကြီးကလည်း သူ့စိတ်ကူးလေးတွေက သူ့မောင်လေးအတွက် အဆင်မပြေမှာ စိုးတယ်...၊ အဓိက သူ့မောင်လေးမကြိုက်မှာစိုးတယ်လေ..။ ကျွန်တော်ကျေနပ်ခြင်းများ များစွာ ဖြစ်ခဲ့ရပါတယ်..။

“မျက်နှာကို ဘာအရောင် ထည့်ရမလဲဖေဖေ...”

ပုံဆွဲနေရင်း သားငယ်က လှမ်းမေးတယ်။

“ မျက်နှာဆိုတော့ အသားချည်းပဲလေ သားရဲ့....။အသားရောင်လေး ဖြည့်လိုက်ပေါ့...”

“အာ... ဖေဖေကလည်း သူက လူမဟုတ်ဘူး.... အရုပ်... အရုပ်”

ဟုတ်သားပဲ သားငယ်ဆွဲနေတာလူပုံမဟုတ်ဘူး... အရုပ်ကလေးရဲ့ပုံပဲ။

“ အေးကွာ...  အဲဒါဆို..... အရုပ်ဆိုတော့  သားအရုပ်ပဲ    သားကြိုက်တဲ့ အရောင်ထည့်လိုက်”

“ဟုတ်...... ထည့်လိုက်မယ် ဖေဖေ”

စကားပြောရင်း အရောင်လေးတွေ ဖြည့်လိုက်၊ မောင်နှမနှစ်ယောက် သူ့ပုံကိုယ်ကြည့်... ကိုယ့်ပုံသူကြည့် လုပ်လိုက်၊ ခဲတံလေးတွေ တစ်ယောက်တစ်လှည့်သုံးလိုက်နဲ့ သင့်လျော်ရာ စိတ်ကူးလေးတွေနဲ့ လှပအောင် ကြိုးစားနေကြလေရဲ့.....။

တကယ်တော့  လူတွေဆိုတာလည်း ရောင်စုံခဲတံဘူးလေးထဲက  ရောင်စုံခဲတံလေးတွေလိုပါပဲ....။ ကိုယ်ပိုင်စာမျက်နှာပေါ်မှာ ကိုယ်ပိုင် အရောင်လေးတွေ ရေးဖြည့်ပြီး ဖြတ်သန်းနေကြရတယ်၊ နေရာနဲ့ အရောင် အဆီအငေါ်တည့်ခြင်း ကွာခြားမှုကတော့ ကိုယ်ဖြည့်သွင်းခဲ့တဲ့ အချိန်မှာ ကိုယ့်ရဲ့ နားလည်တတ်သိမှုက ဆုံးဖြတ်ပေးတာပါပဲ...။

သမီးနဲ့ သားတို့ အရွယ်မှာတော့.. သူများ ဆွဲပေးထားတဲ့ ပုံလေးတွေကို အရောင် ဖြည့်သွင်းယုံနဲ့ ကျေနပ်နိုင်ပေမဲ့... ဒိထက်ကြီးပြင်လာတဲ့ အချိန်မှာတော့ သူတို့ ကိုယ်တိုင် ရေးဆွဲထားတဲ့ ပုံလေးတွေထဲမှာ သူတို့ စိတ်ကြိုက်  အရောင်လေးတွေကို ဖြည့်သွင်းကြတော့မယ်....၊  ဒိထက်ကြီးလာရင်တော့ သူတို့ကိုယ်တိုင် ကာလာပင် သို့မဟုတ် စုတ်တံလေးတွေကိုင်ပြီး ကိုယ်တိုင် အလှအပနဲ့ သဘာဝတရားကို ဖန်တီးကြတော့မယ်...လို့။

“ဖေဖေ ပြီးပြီ.... ကြည့် ကြည့်ပါဦး သားဆွဲထားတာ လှလားလို”

အတွေးလေး ကောင်းနေတုန်းသားငယ်က သူ့ပုံလေးကို လာပြတယ်...၊ သမီးကလည်း ပုံလေးထိုးပေးရင်း “သမီးကိုလည်း ကြည့်ပေးပါဦး ဖေဖေ..” တဲ့။

နှစ်ယောက်စလုံးရဲ့ ပုံလေးတွေကိုကြည့်ရင်း

“ နှစ်ခုလုံးလှတယ်... သားကလည်း သားစိတ်ကြိုက် အရောင်ဖြည့်ထားတယ်...။ သမီးကလည်း သမီးကြိုက်တဲ့ အရောင် ဖြည့်ထားတယ်”။

“သားပုံက အရောင်လေးတွေ အစွန်းထွက်နေတယ်”။

“နောက်တစ်ခါမမဆွဲသလိုဆွဲ၊ အစ လေးတွေမထွက်စေနဲ့၊ ကြည့်လို့မကောင်းဘူး နော်...” 

လို့ ပြောလိုက်တော့ သားငယ်လေးက” ဟုတ်... သားသားက ငယ်သေးတာကိုး....” တဲ့။  သမီးကတော့ ကျေနပ်နေတယ်လေ...။

“ အင်းပါသားရဲ့ နောက်တစ်ခါဆိုရင် သပ်သပ်ရပ်ရပ် ဆွဲလို့နော်၊   မသပ်မရပ်လုပ်တာ မကောင်းဘူး အကျင့်ပါသွားတတ်တယ်။ သားကတော်ပါတယ်။ အရောင်လေးတွေ ရွေးထားတာ လှတယ်”။ ပြောရင်း ခေါင်းလေးကိုပွတ်လိုက်တော့ သားငယ်လေးလဲ သဘောကျသွားလေရဲ့။

သားနဲ့ သမီး ထွက်သွားတော့ ကျွန်တော် ဒီအတိုင်း အတွေးလေးနဲ့ ကျန်ရစ်ခဲ့တယ်...၊ ကျွန်တော်ပုံလှလှလေးတွေ ဆွဲဖြစ်ခဲ့ရဲ့လား။၊ ဆွဲဖြစ်ခဲ့ရင်ကော ဘယ်နှစ်ပုံလောက် ဆွဲပြီးပြီလဲလို့။

တစ်ချို့ ပုံလေးတွေကို ဆွဲဖြစ်ခဲ့ပေမဲ့..အရောင်ပြည့်အောင် မဖြည့်နိုင်ခဲ့ဘူး။  အပြည့်ဖြည့်မယ် ကြံတိုင်း ခဲတံလေးက ကျိုး... ကျိုးသွားလို့။

တစ်ချို့ပုံလေးတွေကျတော့လည်းဆွဲချင်ပေမဲ့ အကြောင်းကြောင်းကြောင့် မဆွဲဖြစ်ခဲ့ပါဘူး..၊ ဒါပေမဲ့ အခုသားနဲ့ သမီးဆိုတဲ့ နှလုံးသားထဲကထွက်လာတဲ့ ပန်းချီကားလေးကိုတော့ နေ့တိုင်း၊ အချိန်တိုင်းမှာ အရောင်လှလှလေးတွေ ဖြည့်နေမိတယ်။ ဒီပုံလေးတွေ လှဖို့အတွက်ကတော့ အမှန်အတိုင်းပြောရရင် ကျွန်တော် ကြိုတင် မစဉ်းစားဖြစ်ခဲ့ဘူးလေ။

နောက်ပြီး ဒီပန်းချီကားလေးတွေ လှဖို့အတွက် ကျွန်တော် ဘယ်လောက်ကြိုးစားရပါစေ၊ ပင်ပမ်းနေပါစေ မမောခဲ့ပါဘူး။  ဘာကြောင့်လည်း ဆိုတော့ ဒီ ပန်းချီကားချပ်လေးတွေကို ကျွန်တော် အရာရာတိုင်းထက် မြတ်နိုးနေလို့ပါ။

ကွန်ဆူးမား