ကမ္ဘာအရပ်ရပ်သို့ ဗုဒ္ဓသာသနာ ပြန့်ပွားပုံ (အပိုင်း ၂)

ကမ္ဘာအရပ်ရပ်သို့ ဗုဒ္ဓသာသနာ ရောက်ရှိပြန့်ပွားပုံ (၄)

လာအိုနိုင်ငံ ဗုဒ္ဓသာသနာ စတင်ပြန့်ပွားပုံ

လာအိုနိုင်ငံသည် ခရစ်နှစ် ၁၄-ရာစုကျမှ သီးခြားနိုင်ငံအဖြစ် ပေါ်ပေါက်လာခဲ့ခြင်းဖြစ်သည်။ လာအို နိုင်ငံဖြစ်ပေါ်လာရေးအတွက် ခမာတို့က ကူညီခဲ့ကြသည်။ ထေရ၀ါဒဗုဒ္ဓဘာသာကိုလည်း ခမာတို့ကပင် လာအို နိုင်ငံအတွင်းသို့ သွင်းယူဖြန့်ဖြူးခဲ့ကြသည်။ လာအိုနိုင်ငံ မပေါ်ပေါက်မီကမူ ထိုဒေသ၌ မဟာယာနဗုဒ္ဓဘာသာ သည်လည်း တည်ရှိခဲ့ဖူးသည်။

နောက်ပိုင်းဘုရင်များသည် ထေရ၀ါဒဗုဒ္ဓဘာသာကို ကာကွယ်စောင့်ရှောက် ထောက်ပံ့ခဲ့ကြသည်။ ခရစ်နှစ် ၁၄-ရာစုနှစ်မှာပင် ထေရ၀ါဒဗုဒ္ဓဘာသာကို နိုင်ငံတော်ဘာသာအဖြစ် ကြေငြာခဲ့ကြသည်။ ထိုအချိန် မှစ၍ ကွန်မြူနစ်များ စတင်အုပ်စိုးသည့် အချိန်အထိ လာအိုနိုင်ငံဗုဒ္ဓဘာသာ စည်ပင်ပြန့်ပွားထွန်းကားခဲ့သည်။ ခမာနှင့် ထိုင်းဗုဒ္ဓဘာသာ အရှိန်အ၀ါသည်လည်း လာအိုနိုင်ငံဗုဒ်္ဓဘာသာအပေါ်သို့ အမြဲတစေ အရိပ်ထိုးနေခဲ့ သည်။ လာအို၊ ကမ္ဘောဒီးယား၊ ထိုင်းနိုင်ငံတို့သည် ထေရ၀ါဒဗုဒ္ဓဘာသာတိုးတက်ရေးအတွက် တူညီသော လမ်းကြောင်းပေါ်၌ လျှောက်လှမ်းခဲ့သော နိုင်ငံများဖြစ်ခဲ့လေသည်။

 Photo by mythencyclopedia.com

ကမ္ဘာအရပ်ရပ်သို့ ဗုဒ္ဓသာသနာ ရောက်ရှိပြန့်ပွားပုံ ( ၅)

မြန်မာနိုင်ငံသို့ ဗုဒ္ဓသာသနာ စတင်ပြန့်ပွားလာပုံ

မြန်မာနိုင်ငံသို့ ဗုဒ္ဓသာသနာရောက်ရှိပုံနှင့် ပတ်သက်၍  အဆိုအမျိုးမျိုး ရှိပါသည်။  ရာမညခေတ်၊ ဥက္ကလာပအရပ်မှ တဖုဿနှင့် ဘလ္လိကတို့သည် မဇ္ဈိမဒေသ(အိန္ဒိယနိုင်ငံ)သို့ ခရီးထွက်ကြရာ ဘုရားပွင့်တော်မူ သည်နှင့် ကြုံတွေ့ရလေသည်။ မြတ်စွာဘုရားသည် ဘုရားဖြစ်တော်မူပြီးနောက် လင်းလွန်ပင်ရင်း၌ နေတော်မူစဉ် ဥက္ကလာပအရပ်သား တဖုဿနှင့် ဘလ္လိကတို့သည် မြတ်စွာဘုရားထံရောက်ရှိ လာကြသည်။ မိမိတို့မှာ အသင့်ပါလာသော ပျားမုန့်ဆွမ်းတို့ကို ကပ်လှူကြလေသည်။

မြတ်စွာဘုရားသည် ပျားမုန့်ဆွမ်းတို့ကို ဘုန်းပေပြီးနောက် ကုန်သည်ညီနောင်တို့အား တရားဟောကြား လေသည်။ ကုန်သည်ညီနောင်တို့သည် ဘုရားနှင့်တရားကိုသာ ဆည်းကပ်သော' ဒွေဝါစိက သရဏဂုံ ' တည် သူ ဥပါသကာများ ဖြစ်ခဲ့ကြလေသည်။ ကုန်သည်ညီနောင်တို့သည် အစဉ်ထာဝရ ကိုးကွယ်ဆည်းကပ်ရန် လျှောက်ထားရာ မြတ်စွာဘုရားသည် လက်ယာလက်တော်ဖြင့် ဦးခေါင်းတော်ကို သုံးကြိမ်သပ်၍ ပါလာသော ဆံတော်ဓာတ် (၈) ဆူကို ပေးသနားတော်မူသည်။

ကုန်သည်ညီနောင်တို့သည် ဆံတော်ဓာတ် (၈) ဆူကိုယူ၍ မိမိတို့ နေရပ်သို့ ပြန်လာခဲ့ကြသည်။ ၎င်းဆံတော်ဓာတ် (၈) ဆူကို အသိကဉ္စနမြို့ ( ရန်ကုန်မြို့ ) သိင်္ဂုတ္တရကုန်းတော်၌ ဌပနာပြီး စေတီတည်ထား ကိုးကွယ်ခဲ့ကြလေသည်။ ဤအဆိုအရ ဆိုလျှင် မြတ်စွာဘုရားရှင် လက်ထက်တော်အခါကတည်းကပင် သာသနာ စတင်ရောက်ရှိလာသည် ဟု ဆိုနိုင်ပါသည်။

အခြားသော မဟာမုနိရုပ်ပွားတော်သမိုင်း၊ ကျိက်ထီးရိုးစေတီသမိုင်း၊ ရွှေစက်တော်သမိုင်းများအရ ဆိုလျှင်လည်း မြတ်စွာဘုရားရှင် သက်တော်ထင်ရှားရှိစဉ်က တည်းကပင် မြန်မာနိုင်ငံနှင့် ဗုဒ္ဓသာသနာရောက်ရှိ ဆက်စပ်မှုများ ရှိနေသည်ကိုလည်း တွေ့ရှိရပေသည်။

သာသနာနှစ် ၂၃၅ နှစ်တွင် အသောကမင်းကြီး၏ ကိုးတိုင်းကိုးဌာန သာသာနာပြုအဖွဲ့များမှ အရှင်သောဏနှင့် ဥတ္တရတို့ သုဝဏ္ဏဘူမိ ( သထုံ၊ ဇင်းကျိုက် ) ဒေသသို့ ရောက်ရှိခဲ့သည် ဟု ဆိုပါသည်။ အရှင်မြတ်တို့သည် သုဝဏ္ဏဘူမိအား ဒုက္ခပေးနေသော ဘီလူးတို့အား တန်ခိုးဖြင့် နှိမ်နှင်းပြီး '' ဗြဟ္မဇာလ သုတ်တော် ” ကို ဟောတော်မူ၍ ပြည်သူ၊ ပြည်သားတို့အား သရဏဂုံသီလ၌ တည်စေခဲ့ကြသည်။

ဗြဟ္မဇာလသုတ်တော်ကို နာကြားရပြီးနောက် ၆၀၀၀၀-သောပရိသတ်တို့သည် သောတာပန်၊ သကဒါဂါမ်၊ အနာဂါမ်၊ ရဟန္တာများ ဖြစ်ကြလေသည်။ ၃၅၀၀-သောယောင်္ကျားတို့သည် ရဟန်းပြုကြလေသည်။ ၁၅၀၀-သော အမျိုးသမီးတို့သည် ရဟန်းမ, ပြုကြကုန်သည် ဟု ဆိုပါသည်။ ဤအဆိုအရဆိုလျှင် သာသနာနှစ် ၂၃၅ ၀န်းကျင်အတွင်း သာသနာတော် ရောက်ရှိခဲ့သည် ဟု ဆိုနိုင်ပါသည်။ သို့သော် သုဝဏ္ဏဘူမိနယ်မြေ သတ်မှတ်မှုနှင့် ပတ်သက်၍ သမိုင်းဆိုင်ရာ အငြင်းပွားမှုများ ရှိနေပါသေးသည်။

၁-ရာစုမှ ၉-ရာစုအတွင်း ထွန်းကားခဲ့ကြသော ဗိဿနိုး၊ သရေခေတ္တရာ၊ ဝေသာလီမြို့ပြနိုင်ငံအဟောင်း များမှ အုတ်စေတီ၊ ရွှေပေချပ်များ၊ ဆင်းတုစသည့် ဗုဒ္ဓဘာသာ အထိမ်းအမှတ်ပစ္စည်းများ တွေ့ရှိထားလေသည်။ နောက်ပိုင်း ၉-ရာစုမှ ၁၁-ရာစုအတွင်းသည်ကား ပုဂံခေတ်အတွင်း ရောက်လာပြီဖြစ်၍ ဗုဒ္ဓဘာသာဆိုင်ရာ အထောက်အထားများလည်း များစွာ ရှိလာပေပြီ။

ထို့ကြောင့် မြန်မာနိုင်ငံသို့ ဗုဒ္ဓဘာသာသည် အစဉ်အလာ ရာဇ၀င်အရ မြတ်စွာဘုရားရှင်လက်ထက် တော်အခါကပင် ရောက်ရှိနေပြီး ခေတ်သစ်သမိုင်းအထောက်အထားအနေဖြင့်မူ ၁-ရာစုမှ ၁၁-ရာစုအတွင်း ပီပီပြင်ပြင် ရောက်ရှိခဲ့သည် ဟု ဆိုနိုင်ပါသည်။

ယနေ့ခေတ်တွင် မြန်မာနိုင်ငံ၌ အသိအမှတ်ပြုထားသော ထေရ၀ါဒဂိုဏ်းကြီး ၉-ဂိုဏ်း ရှိနေပါသည်။ ယင်းတို့မှာ---

၁။        သုဓမ္မာဂိုဏ်း

၂။        ရွှေကျင်ဂိုဏ်း

၃။        မဟာဒွါရဂိုဏ်း

၎။        မူလဒွါရဂိုဏ်း

၅။        အနောက်ချောင်းဒွါရဂိုဏ်း

၆။        ဝေဠုဝန်ဂိုဏ်း

၇။        ငှက်တွင်းဂိုဏ်း

၈။        ဂဏ၀ိမုတ်ဂိုဏ်း

၉။        မဟာရင်ဂိုဏ်း

ထိုဂိုဏ်းကြီးများအနက် သုဓမ္မာဂိုဏ်းမှာ ရှေးအကျဆုံး ဂိုဏ်းကြီးဖြစ်သကဲ့သို့ အင်အားအကြီးဆုံးလည်း ဖြစ်သည်။ ယခုရှိနေသော ဂိုဏ်းကြီးများမှာ ထေရ၀ါဒအယူအဆ ဘောင်အတွင်းမှသာ ကွဲပြားနေသောဂိုဏ်း များသာဖြစ်၍ အမည်သာရှိပြီး အယူဝါဒအားဖြင့် ထူးခြားမှု မရှိကြပေ။ မဟာယာနဂိုဏ်းများကဲ့သို့ ထေရ၀ါဒ ပိဋကတ်ကို ပြုပြင်တော်လှန်၍ တည်ထောင်ထားသော ဂိုဏ်းများ မဟုတ်ကြပေ။ အလေးမထားလောက်သော အယူအဆလေးများကို အခြေခံထားကာ ကွဲပြားနေကြခြင်းမျှသာ ဖြစ်ပါသည်။

မြန်မာနိုင်ငံအစိုးရသည် ကွဲပြားနေသော ဂိုဏ်းကြီးများကို ပေါင်းစည်းလိုသောဆန္ဒဖြင့် ဂိုဏ်းဆရာတော် ကြီးများနှင့် တိုင်ပင်ကာ ထေရ၀ါဒအချင်းချင်း ညီညွှတ်ပါရန် လျှောက်ထားခဲ့သည်။ ထို့နောက် ဂိုဏ်းပေါင်းစုံ သံဃာ့အစည်းဝေးကြီးကို သက္ကရာဇ် ၁၃၄၂-ခု၊ ခရစ်နှစ် ၁၉၈၀-ပြည့်နှစ်၊ နယုန်လတွင် ရန်ကုန်မြို့၊ ကမ္ဘအေးကုန်းမြေရှိ ဆဋ္ဌသံဃာယနာတင်ခဲ့ရာ မဟာပါသာဏလှိုင်ဂူတော်ကြီး၌ ကျင်းပခဲ့သည်။ '' နောင်အခါ မည်သည့်အကြောင်းနှင့်မျှ ဂိုဏ်းကွဲပြားခြင်းကို လက်ခံလိမ့်မည် မဟုတ်ကြောင်း '' သဘောတူညီချက်ကိုလည်း လက်မှတ်ရေးထိုးခဲ့ကြသည်။

ယခုအခါ ဂိုဏ်းပေါင်းစုံ သံဃာ့အစည်းအဝေးကြီးမှ မွေးဖွားပေးခဲ့သော ဂိုဏ်းပေါင်းစုံ သံဃာများပါဝင် သော '' သံဃနာယကအဖွဲ့ '' အဆင့်ဆင့်ကို ဖွဲ့စည်း၍ သာသနာရေးတာဝန်များကို ဆောင်ရွက်နေကြပါသည်။ အမြင့်ဆုံးအဖွဲ့အစည်းအနေဖြင့် '' နိုင်ငံတော် သံဃမဟာနာယကအဖွဲ့ '' ဖြစ်ပြီး တိုင်းအဆင့်၊ မြို့နယ်အဆင့်၊ ရပ်ကျေးအဆင့်များအထိ အဖွဲ့အစည်းများဖွဲ့ကာ ဗုဒ္ဓသာသနာတော်ဆိုင်ရာ သန့်ရှင်း၊ တည်တံ့၊ ပြန့်ပွားရေးများ ကို ၀န်ဆောင်တာဝန်ခံ ဆရာတော်များက ကြိုးစားဆောင်ရွက် သာသနာပြုလျှက်ရှိကြပါသည်။

ကမ္ဘာအရပ်ရပ်သို့ ဗုဒ္ဓသာသနာ ရောက်ရှိပြန့်ပွားပုံ (၆)

အာရှအလယ်ပိုင်း ခိုတန်နိုင်ငံ၌ ဗုဒ္ဓသာသနာ စတင်ပြန့်ပွားပုံ

အာရှအလယ်ပိုင်း၌ ဗုဒ္ဓသာသနာတော် စတင်ရောက်ရှိရာနိုင်ငံမှာ ခိုတန်နိုင်ငံဖြစ်သည်။ ရှေးခေတ်က ခိုတန်နိုင်ငံဆိုသည်မှာ တရုတ်ပြည်အနောက်မြောက်စွန်း ယခုခေတ် တာကစ္စတန်အနီး၌ တည်ရှိခဲ့သည်။ ခိုတန် နိုင်ငံမှတဆင့် အနီးဖြစ်သော ကူချ (Kucha)၊ ဘရုက၊ အဂ္ဂနိဒေသ၊ တာဖန် (Turfan)နှင့် တရုတ်ပြည်သို့ ဗုဒ္ဓ သာသနာတော် စတင်ပြန့်နှံ့ခဲ့သည်။ ထိုမှတဆင့် ကိုးရီးယားနှင့် ဂျပန်နိုင်ငံသို့လည်း ဗုဒ္ဓသာသနာတော် ပြန့်နှံ့ခဲ့ လေရာ ခိုတန်နိုင်ငံသည် ကမ္ဘာ့အရှေ့ဖျားသို့ ဗုဒ္ဓသာသနာတော် ပြန့်နှံ့မှုနှင့်ပတ်သက်လာလျှင်  အရေးပါသော နိုင်ငံတစ်နိုင်ငံဖြစ်ခဲ့သည်။ ထေရ၀ါဒဂိုဏ်း၏ပြန့်နှံ့ရာလမ်းကြောင်းတွင် သီဟိုဠ်နိုင်ငံသည် အရေးကြီးသောဒေသ ဖြစ်ခဲ့သကဲ့သို့ ခိုတန်နိုင်ငံသည်လည်း မဟာယာနဂိုဏ်း၏ ပြန့်ပွားရာလမ်းကြောင်းတွင် အရေးကြီးသော ဒေသ ဖြစ်ခဲ့သည်။

သာသနာနှစ် ၂၅၀-ခန့်တွင် အိန်္ဒိယနိုင်ငံမှ ၀ိဇယသမ္ဘ၀မင်းသည် အာရှအလယ်ပိုင်း ခိုတန်နိုင်ငံသို့ ဗုဒ္ဓ သာသနာတော်ကို ယူဆောင်ခဲ့ကြောင်း ခိုတန်တို့၏ ရှေးဟောင်းမှတ်တမ်းများ ရှိခဲ့သည်။ ထိုအချိန်ခန့်မှာပင် အိန္ဒိယမှ ကျမ်းဂန်တတ်ကျွမ်းသော “အာစရိယဝေရောစန”အမည်ရှိ ဘုန်းတော်ကြီးသည် ခိုတန်နိုင်ငံသို့ သာသနာပြု ကြွရောက်ခဲ့လေရာ ဘုရင်၏ ကြည်ညိုမှုကိုရရှိခဲ့၍ သာသနာတော် စည်ပင်ပြန့်ပွားခဲ့သည်။ ထို့ကြောင့် ခရစ်မပေါ်မီ ၂၁၁-နှစ်ကပင် ခိုတန်နိုင်ငံ၌ ဗုဒ္ဓဘာသာဘုန်းကြီးကျောင်း စတင်ပေါ်ပေါက်ခဲ့လေ သည်။

ထိုအချိန်မှစ၍ ခရစ်နှစ် ၈-ရာစုအထိ ခိုတန်နိုင်ငံ၌ သာသနာတော် စဉ်ဆက်မပြတ် စည်ပင်ပြန့်ပွားခဲ့ ကြောင်းကို နောက်ပိုင်း တရုတ်ခရီးသည် ရဟန်းတော် ရှင်ဖာဟီယန်နှင့် ရွှင်ကျန်တို့က သူတို့၏ ခရီးသွားမှတ် တမ်းများ၌ ဖေါ်ပြခဲ့ကြသည်။ ခိုတန်နိုင်ငံ၌ တန်ဆောင်း၊ ကျောင်းကန်စသော သာသနိကအဆောက်အဦးပေါင်း ၄၀၀-ကျော် တွေ့ရှိခဲ့ကြောင်း ရွှင်ကျန်၏ မှတ်တမ်း၌ ဖေါ်ပြထားလေသည်။

ကမ္ဘာအရပ်ရပ်သို့ ဗုဒ္ဓသာသနာ ရောက်ရှိပြန့်ပွားပုံ ( ၇ )

တရုတ်နိုင်ငံ၌ ဗုဒ္ဓသာသနာ စတင်ပြန့်ပွားပုံ

ဗုဒ္ဓသာသနာတော် မရောက်မီက တရုတ်ပြည်၌ တာအိုနှင့် ကွန်ဖြူးရှပ်အယူဝါဒများကို ယုံကြည်သက် ၀င်ခဲ့ကြသည်။ သို့သော် ထိုအယူဝါဒနှစ်ခုလုံးမှာ လူတို့၏ ဘ၀နေထိုင်နည်းနှင့်လူ့ကျင့်ဝတ်များသာဖြစ်၍ ဘာသာတရားတစ်ခု၏ သဘောလက္ခဏာများ မရှိချေ။

သာသာနာနှစ် ၄၀၀-ခန့်၊ ဘီစီ ၁၀၀-ခန့် တွင်မှ အာရှအလယ်ပိုင်း ခိုတန်၊ ကူချစသော ဒေသများမှ ပိုးလမ်းမကြီးအတိုင်း လာရောက်ကြသော ကုန်သည်များနှင့် ရဟန်းတော်များ ယူဆောင်လာကြသဖြင့် တရုတ် ပြည်သို့ ဗုဒ္ဓသာသနာတော် စတင်ရောက်ရှိလာသည်။

သာသနာနှစ် ၆၀၀-ခန့်၌မူ ဟန်မင်းဆက်ဘုရင်များသည် အိန္ဒိယနိုင်ငံမှ ရဟန်းတော်များကို တရုတ်ပြည်သို့ ပင့်ဆောင်၍ သာသနာပြုစေကြသည်။ ထိုရဟန်းတော်များသည် မဟာယာနဗုဒ္ဓဘာသာကျမ်း အမြောက်အများကို ယူဆောင်လာကြပြီး တရုတ်ဘာသာသို့ ပြန်ဆိုခဲ့ကြသည်။ ထိုရဟန်းတော်များထဲမှ အရှင်ကဿပမာတင်္ဂမထေရ်နှင့် အရှင်ကုမာရဇီဝမထေရ်တို့မှာ အထင်ရှားဆုံးပညာရှင်များ ဖြစ်ကြသည်။

သာသနာနှစ် ၉ -ရာစုမှ ၁၂-ရာစုအတွင်း၌ တရုတ်ရဟန်းတော်များလည်း အိန်္ဒိယနိုင်ငံသို့ကြွရောက်၍ စာပေကျမ်းဂန်များ သင်ကြားလေ့လာကြပြီး မဟာယာနကျမ်းစာ အမြောက်အများကို ယူဆောင်ခဲ့ကြကာ ဘာသာပြန်ဆို ဖြန့်ဝေခဲ့ကြသည်။ ထိုရဟန်းတော်များထဲမှ ရဟန်းတော် ဖာဟီယန်၊ ရွှင်ကျန်နှင့် အိကျင်တို့သည် ခရီးသွားမှတ်တမ်းများကို စေ့စေ့စပ်စပ် ရေးသားခဲ့ကြသဖြင့် နှောင်းခေတ် ဗုဒ္ဓဘာသာလေ့လာသူများအတွက် လွန်စွာ အကျိုးကျေးဇူးများခဲ့ပါသည်။

သာသနာနှစ် ၁၁-ရာစုတွင် အိန္ဒိယရဟန်းတော် အရှင်ဗောဓိဓမ္မသည် တရုတ်ပြည်သို့ ကြွရောက်ပြီး ဈင်ဂိုဏ်းကို တည်ထောင်ခဲ့သည်။ ယခုအခါ ထိုဈင်ဂိုဏ်းသည် တရုတ်ပြည်၌ ကွယ်ပျောက်၍ ဂျပန်ပြည်နှင့် ကိုရီးယားနိုင်ငံများ၌ ထွန်းကားလျက်ရှိသည်။ ဥရောပတိုက်နှင့် အမေရိကတိုက်နိုင်ငံများ၌လည်း ပြန့်နှံ့လျက်ရှိ လေသည်။ ဈင်ဂိုဏ်းနှင့်အလားတူ တရုတ်ပြည်ဖြစ် အခြားဂိုဏ်းတစ်ဂိုဏ်းလည်း ရှိသေးသည်။ ထိုဂိုဏ်းမှာ သာသနာနှစ် ၁၂၀၀-ခန့်က ပေါ်ထွန်းလာသော သုခ၀တီဗျူဟာဂိုဏ်း ဖြစ်သည်။

ဗုဒ္ဓဘာသာသည် တရုတ်ပြည်၌ အကြပ်အတည်းအခက်အခဲများကြားမှ ပြန့်ပွားခဲ့ရခြင်းဖြစ်သည်။ ကွန်ဖြူးရှပ်အယူဝါဒသည် မင်းဆွေမင်းမျိုးတို့ ကိုးကွယ်သောအယူဝါဒဖြစ်ခဲ့လေရာ ဗုဒ္ဓဘာသာတဖြည်းဖြည်း အားကောင်းလာသည်ကို မနှစ်မြို့နိုင်သော ဘုရင်အသိုင်းအ၀ိုင်းက အကြောင်းအမျိုးမျိုးရှာ၍ နှိပ်ကွပ်ခြင်းခံခဲ့ ရသော အချိန်များလည်းရှိခဲ့သည်။ ရဟန်းတော်များဘက်က ပရိယတ်၊ ပဋိပတ်အလုပ် အားမထုတ်ဘဲ အကျင့် သိက္ခာ ချွတ်ယွင်းပျက်ပြားကြသဖြင့် နှိမ်နှင်းခံကြရသည့် အချိန်အခါများလည်း ရှိခဲ့သည်။

သို့သော်လည်း အချိန်ကာလ ကြာမြင့်လာသည်နှင့်အမျှ ဗုဒ္ဓဘာသာအားကောင်းလာသဖြင့် ယခုအချိန် တွင် တာအိုနှင့် ကွန်ဖြူးရှပ်ဝါဒတို့ထက် ပို၍စည်ပင်ပြန့်ပွားလျက်ရှိသည်။ ကွယ်လွန်သူ ဘိုး၊ ဘွားအစဉ်အဆက် ကို ပူဇော်ကန်တော့သော (Ancester Worship) အယူဝါဒမှာလည်း ယနေ့တိုင်ထွန်းကား လျက်ရှိလေသည်။

ကမ္ဘာအရပ်ရပ်သို့ ဗုဒ္ဓသာသနာ ရောက်ရှိပြန့်ပွားပုံ (၈ )

ကိုးရီးယားနိုင်ငံ၌ ဗုဒ္ဓသာသနာ စတင်ပြန့်ပွားပုံ

ခရစ်နှစ် ၄-ရာစု၌ ကိုးရီးယားနိုင်ငံသို့ တရုတ်ပြည်အရှေ့၊ ချင်မင်းဆက်မှတဆင့် မဟာယာနဗုဒ္ဓဘာသာ စတင်ရောက်ရှိလာသည်။ ဗုဒ္ဓဘာသာမရောက်မီက အများအားဖြင့် နတ်ကို ကိုးကွယ်ခဲ့ကြသည်။ ကွန်ဖြူးရှပ် နှင့် တာအိုကိုးကွယ်မှုလည်း အနည်းငယ်ရှိခဲ့ကြသည်။

ကိုးရီးယားကျွန်းဆွယ်၌ ဗုဒ္ဓဘာသာမရောက်မီက ကိုဂုရယို၊ ပက်ချီ၊ ဆိလ္လ ဟုခေါ်သော နိုင်ငံငယ် သုံးနိုင်ငံရှိခဲ့သည်။ ထိုသုံးနိုင်ငံအနက် ကိုဂုရယိုသို့ ခရစ်နှစ် ၃၇၂-ခုနှစ်တွင် ဗုဒ္ဓဘာသာစတင် ရောက်ရှိခဲ့သည်။ တရုတ်ပြည် ချင်မင်းဆက်မှ ဖူချီအင်ဘုရင် စေလွှတ်လိုက်သော သာသနာပြုအဖွဲ့ခေါင်းဆာင် မဟာယာနဘုန်း တော်ကြီး ဆွန်ဒို မှ ယူဆောင်လာခဲ့ခြင်းဖြစ်သည်။ ထို့နောက် ၁၂-နှစ်အကြာတွင် ပက်ချီသို့လည်းကောင်း၊ နှစ် ၃၀-အကြာတွင် ဆိလ္လသို့လည်းကောင်း ဗုဒ္ဓဘာသာ စတင်ရောက်ရှိခဲ့သည်။

ကိုးရီးယားလူမျိုးများသည် ဗုဒ္ဓဘာသာကို လွယ်လွယ်ကူကူဖြင့်ပင် လက်ခံခဲ့ကြသည်။ အထူးအားဖြင့် မင်းဆွေမင်းမျိုးများနှင့် ပညာတတ်အသိုင်းအ၀ိုင်းများက ပိုမိုနှစ်ခြိုက်စွာ ကိုးကွယ်ခဲ့ကြသည်။ ထိုအချိန်တွင် ကိုးရီးယားလူမျိုးများ မူလက ကိုးကွယ်ခဲ့သော ဘာသာတရားမှာ မည်သည့်အခြေအမြစ်မျှ မရှိသောကြောင့် လည်းကောင်း၊ အချင်းချင်း အမြဲလိုလို တိုက်ခိုက်နေရသဖြင့် ကိုးကွယ်မှုလမ်းစ ပျောက်ကွယ်သလောက်ဖြစ်နေ သောကြောင့်လည်းကောင်း၊ ကိုးရီးယားတို့ အထင်ကြီးထားသည့် တရုတ်ပြည်ကြီးမှလာသော ဗုဒ္ဓဘာသာမှာ အခြေခိုင်မာ၍ အဆင့်မြင့်သော တရုတ်ယဉ်ကျေးမှုသဘောလက္ခဏာများ ပါဝင်နေသောကြောင့်လည်းကောင်း လွယ်ကူစွာ ယုံကြည်ကိုးကွယ်ခဲ့ကြခြင်း ဖြစ်သည်။

ထို့ကြောင့်ပင် ကိုးရီးယားနိုင်ငံသို့ ဗုဒ္ဓဘာသာရောက်ရှိလာပြီး နှစ်ပေါင်း ၁၅၀-အကြာ ဆိလ္လနိုင်ငံ၌ ဗုဒ္ဓဘာသာကို နိုင်ငံတော်ဘာသာအဖြစ် ဘုရင်ပို့ဟွန်က ကြေငြာခဲ့သည်။ အချို့သော မူမတ်များနှင့်နန်းတွင်းသူ၊ သားများက ဘုရင်သည် သူ၏သြဇာအာဏာကျယ်ပြန့်ရေးနှင့် ဗဟိုကထိန်းချုပ်သော အုပ်ချုပ်ရေးခိုင်မာစေရန် အတွက် နိုင်ငံတော်ဘာသာအဖြစ် ကြေငြာခြင်းဖြစ်သည် ဟု ယူဆကာ မကျေမနပ်ဖြစ်ခဲ့ကြသည်။

ခရစ်နှစ် ၆၆၀-ခုနှစ်၌ တရုတ်ပြည်နှင့် ဆိလ္လနိုင်ငံတို့ မဟာမိတ်စာချုပ် ချုပ်ဆိုကြသည်။ မကြာမီပင် ဆိလ္လဘုရင်သည် တရုတ်တို့၏ အကူအညီဖြင့် ကိုဂုရယိုနှင့် ပက်ချီနိုင်ငံတို့ကို တိုက်ခိုက်သိမ်းယူပြီး ခရစ်နှစ် ၆၆၈-ခုနှစ်တွင် ကိုးရီးယားသုံးနိုင်ငံ ပေါင်းစည်းရေးကို အကောင်အထည်ဖော်ခဲ့သည်။ ထိုသို့ သုံးနိုင်ငံကို တစ် နိုင်ငံတည်းအဖြစ် ပေါင်းစည်းနိုင်ခြင်းမှာ ဗုဒ္ဓဘာသာ၏ စွမ်းအားကြောင့်ဖြစ်ကြောင်း ဆိလ္လနိုင်ငံသားတို့က ယုံ ကြည်ခဲ့ကြသည်။ ထို့ကြောင့် သုံးနိုင်ငံပေါင်းစည်းရေးအထိမ်းအမှတ်အဖြစ်ဖြင့် ခရစ်နှစ် ၇၇၆-ခုနှစ်တွင် နယ်ဂျန် တောင်ပေါ်ရှိ ပို့ဂျုကျောင်းတိုက်အတွင်း၌ ဉဏ်တော် ၃၃-မီတာရှိသော အရိမေတ္တေယျ မတ်တတ်ရပ်အလောင်း တော် ရုပ်တုကြီးကို ထုလုပ်ကိုးကွယ်ခဲ့ကြသည်။

ခရစ်နှစ် ၆၆၈ မှ ၉၃၅-ခုနှစ်အထိ ကိုးရီးယားနိုင်ငံ၌ ဆိလ္လမင်းဆက်များ အုပ်စိုးခဲ့ကြပြီး ဗုဒ္ဓသာသနာအထွန်းကားဆုံး ဖြစ်ခဲ့သည်။ သို့ဖြစ်၍ ဤအချိန်ကာလကို ကိုးရီးယားဗုဒ္ဓဘာသာရွှေခေတ် ဟု ခေါ်ဆိုကြသည်။ ဤခေတ်၌ ကိုးရီးယားနိုင်ငံတွင် ကြီးကျယ်ခန်းနားသော ကျောင်းကန်ဘုရားများကို ဆောက်လုပ်တည်ထားခဲ့ကြသည်။ အရိမေတ္တေယျဘုရားလောင်း၊ အ၀လောကိတေသွာရဘုရားလောင်း ရုပ်တုကြီးများကို တည်ထားကိုးကွယ်ခဲ့ကြသည်။ ကိုးရီးယားဘုန်းတော်ကြီးများသည်လည်း တရုတ်ပြည်၊ အိန်္ဒိယပြည်များသို့ သွားရောက်၍ ပညာများသင်ယူကြပြီး အပြန်တွင် မဟာယာနကျမ်းစာများကို ယူဆောင်ခဲ့ကြသည်။ ထို့အပြင် တရုတ်ပြည်မှ ၀ိနယဂိုဏ်း၊ နိဗ္ဗာနဂိုဏ်း၊ ဓမ္မသဘာဝဂိုဏ်း၊ အ၀တံသကဂိုဏ်း၊ ယောဂါစာရဂိုဏ်းစသော သုတ္တန်ဂိုဏ်းများကိုလည်း ကိုးရီးယားနိုင်ငံသို့ ယူဆောင်ခဲ့ကြသည်။ ထိုသုတ္တန် ဂိုဏ်းများကို ကျို (Kyo) ဂိုဏ်းများဟု ခေါ်ကြသည်။

ခရစ်နှစ် ၈၂၅-ခုနှစ်တွင် တရုတ်ပြည်မှ ပညာသင်၍ ပြန်လာသော ဘုန်းတော်ကြီး တိုအိက ကိုးရီးယား ၌ ဈင်ဂိုဏ်းကို စတင်တည်ထောင်ခဲ့သည်။ ဈင်ဂိုဏ်း၏ အယူဝါဒမှာ ဘာမှမလုပ်ဘဲ သူ့အလိုလို ရုတ် တရက်ဉာဏ်အလင်းရခြင်း ဖြစ်လေရာ တရားကျမ်းဂန်များကို အလေးထားသော ကျိုဂိုဏ်းနှင့် ထိပ်တိုက် တွေ့လေသည်။ သို့သော် ထိုဈင်ဂိုဏ်းမှာလည်း တဖြည်းဖြည်းပြန့်ပွားလာပြီး တောင်ကိုးလုံးပေါ်၌ရှိသော ဈင်ကျောင်း ၉-ကျောင်းကို အစွဲပြု၍ တောင်ကိုးလုံးဈင်ဂိုဏ်းဟူသော ဝေါဟာရပေါ်ပေါက်လာလေသည်။ ဈင်ဂိုဏ်းကို ကိုးရီးယားဘာသာအားဖြင့် ဆုန် (Son) ဂိုဏ်းဟု ခေါ်ဝေါ်ကြရာ ထိုအချိန်မှစ၍ ဆုန်ဂိုဏ်းနှင့် ကျိုဂိုဏ်းတို့ အကြီးအကျယ် ပဋိပက္ခဖြစ်ခဲ့ကြသည်။

ခရစ်နှစ် ၁၄-ရာစုနောက်ပိုင်းမှစ၍ အုပ်ချုပ်သောဘုရင်တို့သည် ဗုဒ္ဓဘာသာကိုအားမပေးဘဲ နှိပ်ကွပ် ခဲ့ကြသည်။ သို့သော် ၁၆-ရာစုအလယ်ပိုင်းသို့ ရောက်သောအခါ မွန်ဂိုဘုရင်မကြီးက အားပေးချီးမြှေက်သဖြင့် ဗုဒ္ဓသာသနာတော် ပြန်လည်ရှင်သန်လာခဲ့ပြန်သည်။ ၁၆-ရာစု နောက်ပိုင်းမှစ၍ ဂျပန်နိုင်ငံက အကြိမ်များစွာ တိုက်ခိုက်သိမ်းပိုက်မှု ပြုလုပ်ခဲ့သည်။ ထိုအချိန်မှစ၍ ဂျပန်ဗုဒ္ဓဘာသာ တဖြည်းဖြည်း လွှမ်းမိုးလာခဲ့ပြန်သည်။ ထိုအခါ ကိုးရီးယားဗုဒ္ဓဘာသာဝင်များက မိမိတို့ဘာသာ၏ သဘောလက္ခဏာများကို ထိန်းသိမ်းနိုင်ရန်အတွက် ပို၍ စည်းလုံးမှုပြု လုပ်လာကြသည်။ ဤသို့အားဖြင့် ယခင်က ပဋိပက္ခဖြစ်နေခဲ့ကြသည့် ဆုန်(ဈင်)ဂိုဏ်းနှင့် ကျို ဂိုဏ်း (သုတ္တန်ဂိုဏ်း) တို့သည် ၁၉၃၅-ခုနှစ်တွင် ချိုဂဲ ဟူသော အမည်ဖြင့် တစ်ဂိုဏ်းတည်း အဖြစ်သို့ ပေါင်းစည်းမိခဲ့ကြလေသည်။

ဂျပန်လက်အောက်သို့ ကျရောက်နေစဉ်အချိန်က ဂျပန်အာဏာပိုင်တို့သည် ကိုးရီးယားဘုန်းကြီးများကို ဂျပန်ဘုန်းကြီးများနည်းတူ အိမ်ထောင်ပြုစေခဲ့ကြသည်။ ဂျပန်လက်အောက်မှ လွတ်မြောက်သည့် ၁၉၄၅-ခုနှစ် ၌ ကိုးရီးယားဘုန်းကြီးများကို စာရင်းကောက်သောအခါ ဘုန်ကြီး ၇၀၀၀-ခန့်ရှိသည့်အနက် ၆၀၀-ခန့်သာ အိမ် ထောင်မပြုဘဲ အစဉ်အလာကို ထိန်းသိမ်းခဲ့ကြောင်း တွေ့ရှိရလေသည်။

ဂျပန်လက်အောက်မှ လွတ်မြောက်၍ ကိုးရီးယားသမ္မတနိုင်ငံ တည်ထောင်သောအခါ ပထမဦးဆုံး သမ္မတ ဆစ်ဂမန့်ရီးသည် အိမ်ထောင်ပြုသော ဘုန်းကြီးများကို သက်ဆိုင်ရာကျောင်းများမှ နှင်ထုတ်စေခဲ့သည်။ အိမ်ထောင်ပြုခြင်းကို ဆန့်ကျင်သော ချိုဂဲဂိုဏ်းကလည်း မိမိတို့၏ စည်းမျဉ်းဥပဒေသများကို ခေတ်နှင့်အညီ ပြုပြင်ခဲ့ကြသည်။ သို့ဖြစ်၍ ယခုအချိန်တွင် အိမ်ထောင်ပြုသော ဘုန်းကြီးများ တဖြည်းဖြည်းနည်းပါးလာပြီး ကိုးရီးယားဗုဒ္ဓဘာသာ၏ သဘောလက္ခဏာများ တစ၊ တစ ပေါ်လွင်လာနေပြီဖြစ်သည်။

ကမ္ဘာအရပ်ရပ်သို့ ဗုဒ္ဓသာသနာ ရောက်ရှိပြန့်ပွားပုံ ( ၉ )

ဂျပန်နိုင်ငံ၌ ဗုဒ္ဓသာသနာ စတင်ပြန့်ပွားပုံ

ဂျပန်လူမျိုးများသည် ဂျပန်ပြည်သို့ ဗုဒ္ဓဘာသာမရောက်မီက ရှင်တိုဘာသာကို ကိုးကွယ်ခဲ့ကြသည်။ ရှင်တိုဘာသာဆိုသည်မှာ နတ်ကိုးကွယ်မှုတစ်မျိုးပင်ဖြစ်ပြီး ကွယ်လွန်သွားသော ဘိုးဘွားစဉ်ဆက်ကို ကိုးကွယ် သော အယူဝါဒဖြစ်သည်။ ခရစ်နှစ် ၅၅၂-ခုနှစ်တွင် ကိုးရီးယားကျွန်းဆွယ်ရှိ ပက်ချိ (Packche) နိုင်ငံမှ သံတမန်တစ်ဦးသည် ဗုဒ္ဓဆင်းတုတော်များ၊ ကျမ်းစာများကို ဂျပန်ပြည်သို့ ယူဆောင်လာရာမှ မဟာယာန ဗုဒ္ဓဘာသာ စတင်ပြန့်ပွားခဲ့သည်။

ဗုဒ္ဓဘာသာကို ရှေးဦးစွာ ကိုးကွယ်သောဘုရင်မှာ ယိုမေ ( Yomei ) ဘုရင်ဖြစ်ပြီး ထိုစဉ်က မင်းဆွေ မင်းမျိုးတို့သည် သပ္ပါယ်လှသော ဗုဒ္ဓရုပ်ပွားဆင်းတုတော်ကို ဘေးရန်အန္တရာယ်ကို ကာကွယ်ပေးနိုင်၍ လောကီ ကောင်းကျိုးချမ်းသာများကို ရရှိစေနိုင်သော နတ်ရုပ်အဖြစ် ယုံကြည်လျက် လက်ခံကိုးကွယ်ခဲ့ကြသည်။ ဗုဒ္ဓ ဘာသာကိုလည်း ရှင်တိုဘာသာကဲ့သို့ နတ်ကိုးကွယ်သော ဘာသာတစ်ခုအဖြစ် ယုံကြည်ယူဆခဲ့ကြလေသည်။

ဗုဒ္ဓဘာသာသည် ဂျပန်ပြည်၌ ရှေးဆန်သော အစွဲအလမ်းကြီးသည့် ရှင်တိုဘာသာဝင်အချို့၏ ဆန့်ကျင် မှုကို အနည်းငယ်တွေ့ရသော်လည်း  ဗုဒ္ဓဘာသာနှင့်အတူ တိုးတက်နေပြီဖြစ်သော တရုတ်ယဉ်ကျေးမှုလည်း ပူးတွဲပါလာသဖြင့် ဂျပန်မင်းဆွေမင်းမျိုးများနှင့် ပညာတတ်အပိုင်းက အခက်အခဲမရှိလှဘဲ လက်ခံခဲ့ကြသည်။ မင်းဆွေမင်းမျိုးများထဲမှ ရှိုတိုကူ (Shotoku) အိမ်ရှေ့မင်းသား၏ အားပေးချီးမြှောက်မှုမှာ လွန်စွာခရီးရောက် ခဲ့သည်။ ထိုမင်းသားသည် ခရစ်နှစ် ၆၀၇-ခုနှစ်၌ ဂျပန်ပြည်တွင် ရှေးအကျဆုံးဖြစ်သော ဟိုရယူဂျီစေတီကို လည်း တည်ထားကိုးကွယ်ခဲ့သည်။

ခရစ်နှစ် ၈ ရာစု (၇၁၀-၇၈၄) နာရခေတ်၌ စံရွန်ဂိုဏ်း၊ ဂျိုဂျစ်ဆုဂိုဏ်းစသည့် ဗုဒ္ဓဘာသာဂိုဏ်း ၆-ဂိုဏ်း ပေါ်ပေါက်ခဲ့သည်။ ထိုဂိုဏ်းတို့တွင် ခရစ်နှစ် ၇၅၄-တွင် ပေါ်ထွန်းလာသော ရစ်ဆု (၀ိနယ) ဂိုဏ်းက စနစ်ကျ သော ရဟန်းခံ၊ ရှင်ပြု၊ သီလရှင်ဝတ်နည်း စည်းမျဉ်းဥပဒေသတို့ကို ချမှတ်ပေးခဲ့သည်။ ယနေ့တိုင် နာရဘုရား ကြီး ဟု ထင်ရှားလျက်ရှိသော မဟာဝေရောစန ကြေးဆင်းတုတော်ကြီးကိုလည်း ဤနာရခေတ်၌ပင် တည်ထား ခဲ့ကြ ခြင်းဖြစ်သည်။

၈-ရာစုကုန်ခါနီးမှ ၁၂-ရာစုကုန်ခါနီး (၇၉၄-၁၁၈၄) အထိဖြစ်သော ဟေယန်ခေတ်တွင် ဂျပန်ဗုဒ္ဓ ဘာသာ၌ တင်ဒိုဂိုဏ်းနှင့် ရှင်ဂွန်းဂိုဏ်းဟူသော ဂိုဏ်းနှစ်ဂိုဏ်းပေါ်လာသည်။ ထိုတွင် ရှင်ဂွန်းဂိုဏ်းမှာ တန္တရ ဂိုဏ်းဖြစ်၍ အင်းအိုင်လက်ဖွဲ့၊ ဂါထာမန္တန်များ အားကောင်းလာသည်။ ထိုခေတ်တွင် ဘုန်းကြီးများအားလုံးက နိုင်ငံရေးတွင် ပါဝင်လာကြသဖြင့် သာသနာတော် တဖြည်းဖြည်း ဆုတ်ယုတ်လာသည်။

ဟေယန်ခေတ်ကုန်၍ ကမာကုရခေတ် (၁၁၈၅-၁၃၃၃) သို့ ရောက်သောအခါ ကမ္ဘာကျော် ကမာကုရ ကြေးဆင်းတုတော်ကြီးကို ထုလုပ်ကိုးကွယ်ခဲ့ကြသည်။ ဤခေတ်တွင် ဂျိုဒိုဂိုဏ်းနှင့် ဂျိုဒိုရှင်ဂိုဏ်းဟူသော ထူးခြားသည့် ဗုဒ္ဓဘာသာဂိုဏ်း နှစ်ဂိုဏ်းပေါ်ပေါက်ခဲ့သည်။ ထိုနှစ်ဂိုဏ်းလုံးသည် အမိတာဘာဘုရား၏ နာမည် ကို အကြိမ်များစွာ ရွတ်ဆိုခြင်းအားဖြင့် နိဗ္ဗာန်သို့ ရောက်နိုင်သည် ဟု ယုံကြည်ကြသည်။

ဤခေတ်တွင် ဈင်ဂိုဏ်းများလည်း တရုတ်ပြည်မှတဆင့် ရောက်လာကြသည်။ ထိုတွင် ရင်ဇိုင်းဈင်ဂိုဏ်း က “ တရားအားထုတ်ဖို့ မလို၊ အဆင်သင့်သည့်အခါ ဉဏ်အလင်း အလိုအလျောက်ပေါ်လာသည် ” ဟု ဟော ပြောသည်။ အိုတိုဈင်ဂိုဏ်းကမူ “ ဉဏ်အလင်းကို အလိုအလျောက် မရနိုင်၊ တရားအားထုတ်မှသာလျှင် တစ်ဆင့်ပြီးတစ်ဆင့် ဉဏ်အလင်းပေါ်လာနိုင်သည် ” ဟုဆိုလေသည်။ ထို့အပြင် နိချိရှင်အမည်ရှိ ဘုန်းတော် ကြီးတစ်ပါး တည်ထောင်သည့် နိချိရင်ဂိုဏ်းကလည်း မဟာယာနကျမ်းစာဖြစ်သော သဒ္ဓမ္မပုဏ္ဍရိကကျမ်း၏ အမည်ကို အကြိမ်များစွာ ရွတ်ဆိုခြင်းဖြင့် နိဗ္ဗာန်သို့ ရောက်နိုင်သည် ဟု ဟောပြောခဲ့လေသည်။

ဤကမာကုရခေတ်၌ အထင်ရှားဆုံးအချက်တစ်ခုမှာ ဂျိုဒိုရှင်ဂိုဏ်းကို တည်ထောင်သော ဘုန်းကြီး ရှင်ရန်က အိမ်ထောင်ပြုလိုက်ပြီး အခြားဘုန်းကြီးများကိုလည်း သူကဲ့သို့ပင် အိမ်ထောင်ပြုကြရန် တိုက်တွန်းခဲ့ သဖြင့် ယနေ့အထိ ဂျပန်ဘုန်းကြီးများ အိမ်ထောင်ပြုကြသော အစဉ်အလာ ပြန့်ပွားလာခဲ့ခြင်း ဖြစ်လေသည်။

ခရစ်နှစ် ၁၆-ရာစုမှစ၍ နောက်ပိုင်းခေတ်များတွင် တချို့သော အာဏာပိုင်တို့လက်ထက်၌ ဗုဒ္ဓဘာသာ အား နှိပ်ကွပ်မှုပြုလုပ်ခဲ့ကြသော်လည်း ဗုဒ္ဓဘာသာတရားတော်များမှာ ဂျပန်လူမျိုးတို့၏ နိုင်ငံရေးနှင့် ယဉ်ကျေးမှု နယ်ပယ်၌ သြဇာလွှမ်းမိုးမြဲ လွှမ်းမိုးလျက်သာ ရှိခဲ့သည်။ တိုကူဂါဝါခေတ် (၁၆၁၅-၁၈၆၈) တွင် ဗုဒ္ဓဘာသာမှာ နိုင်ငံတော်ဘာသာ ဖြစ်လာပြီး ဂျပန်လူမျိုးတိုင်း ဗုဒ္ဓဘာသာကျောင်းတစ်ကျောင်း၌ ဗုဒ္ဓဘာသာဝင်ဖြစ်ကြောင်း မှတ်ပုံတင်ရသည့် အစဉ်အလာဖြစ်ပေါ်ခဲ့လေသည်။ နိုင်ငံခြားသားနှင့် ခရစ်ယာန်ဝါဒကို ဟန့်တားရန် လက်  ထပ်ခြင်း၊ မွေးသေခြင်းစသော လူမှုကိစ္စများကို ဘုန်းကြီးများထံ မှတ်ပုံတင်ကြရလေသည်။

ယခုခေတ်တွင်မူ ဂျပန်ဘုန်းကြီးအများစုသည် အိမ်ထောင်သားမွေး စီးပွားရေးအလုပ်များကို လုပ်နေ ကြသဖြင့် သာမန်လူတို့နှင့် များစွာခြားနားမှု မရှိတော့ပေ။ အသုဘပွဲများနှင့် တစ်နှစ်တစ်ကြိမ် ကွယ်လွန်သူ ဘိုး၊ ဘွားများကို ပူဇော်ပွဲပြုလုပ်သောအခါတို့၌ တရားကျမ်းစာများ ရွတ်ဖတ်ပေးခြင်းမှတပါး အခြားဘာသာရေး အလုပ် ဟူ၍လည်း မယ်မယ်ရရ မရှိတော့ချေ။ ပြည်သူလူထုအများစုလည်း ဗုဒ္ဓဘာသာအမည်ခံရုံသာ ရှိတော့သည်။ မေဂျီခေတ် ၁၈၆၅-မှစ၍ အာဏာပိုင်များက ရှင်တိုဘာသာကို နိုင်ငံတော်ဘာသာအဖြစ် ပြုလုပ်ခဲ့ကြလေသည်။

ကမ္ဘာအရပ်ရပ်သို့ ဗုဒ္ဓသာသနာ ရောက်ရှိပြန့်ပွားပုံ ( ၁၀ )

တိဗက်နိုင်ငံ၌ ဗုဒ္ဓသာသနာ စတင်ပြန့်ပွားပုံ

တိဗက်နိုင်ငံတွင် ဗုဒ္ဓဘာသာမရောက်မီက တိဗက်လူမျိုးများသည်  ဘွန်းဘာသာကို ကိုးကွယ်ခဲ့ကြ သည်။ ဘွန်းဘာသာဆိုသည်မှာ တော၊ တောင်၊ မြစ်၊ ချောင်း၊ အင်း၊ အိုင် များနှင့် တောစောင့်နတ်၊ တောင် စောင့်နတ် စသည်တို့ကို ကိုးကွယ်ခြင်း၊ စုန်း၊ ကဝေ၊ မှော်ဆရာ၊ ပျောက်စေဆရာတို့ကို ကိုးကွယ်ခြင်းဖြစ်သည်။

သာသနာနှစ် ၁၀၀၀ ခန့်၊ ခရစ်နှစ် ၅-ရာစုခန့်တွင် အိန္ဒိယနိုင်ငံမှ ဗုဒ္ဓဘာသာဘုန်းတော်ကြီးများ၏ သာသနာပြုလုပ်ငန်းများကြောင့် တိဗက်နိုင်ငံ၌ ဗုဒ္ဓဘာသာ စတင်ပြန့်ပွားလာသည်။ သို့သော် ခိုင်လုံသော မှတ်တမ်းနှင့် အထောက်အထားကား မရှိချေ။ ခရစ်နှစ် ၇-ရာစု (သာသနာနှစ် ၁၂၀၀) ခန့်တွင် နန်းစံသော ဘုရင်စုန်စင်ဂမ်ပိုလက်ထက်၌ ဗုဒ္ဓဘာသာရောက်ရှိခဲ့ကြောင်းကား ခိုင်လုံသော အထောက်အထားများအရ သိရသည်။

ဘုရင်စုန်စင်ဂမ်ပိုသည် လက်ရုံးရည်၊ နှလုံးရည်နှင့် ပြည့်စုံသော ဘုရင်ဖြစ်သည်။ ထို့ကြောင့် တရုတ် ဧကရာဇ် တိုင်စုန် (Tai Sung) က သမီးတော် ၀မ်ချင်ကိုလည်းကောင်း၊ နီပေါဘုရင် အံသုဝါမန် (Amsu varman)က သမီးတော် ဘရုကုတီကိုလည်းကောင်း၊ ဘုရင်ဂမ်ပိုထံဆက်သ၍ တိဗက်နိုင်ငံနှင့် ရွှေလမ်း၊ ငွေလမ်း ဖွင့်ခဲ့ကြသည်။ ထိုအချိန်တွင် တရုတ်နှင့် နီပေါတွင် ဗုဒ္ဓဘာသာပြန့်ပွားနေပြီဖြစ်ရာ မင်းသမီးနှစ်ပါးလုံး သည် မိမိတို့ ကိုးကွယ်ရန် အက္ခောဘဘုရားလောင်းရုပ်တု၊ အရိမေတ္တေယျဘုရားလောင်းရုပ်တုနှင့် သကျမုနိ ဆင်းတုတော်များကို ယူဆောင်ခဲ့ကြသည်။ ဤအချက်မှာ တိဗက်နိုင်ငံ၌ ဗုဒ္ဓသာသနာပြန့်ပွားခြင်း၏ အကြောင်း တစ်ရပ် ဖြစ်ပေသည်။

ဘုရင်ဂမ်ပိုသည် ပညာရှင် ၁၇-ဦးပါဝင်သော အဖွဲ့ကို အိန္ဒိယသို့ စေလွှတ်၍ အက္ခရာအရေးအသားနှင့် ဘာသာစာပေတို့ကို လေ့လာတီထွင်စေခဲ့သည်။ ထိုအဖွဲ့သည် မဟာယာနဗုဒ္ဓဘာသာကျမ်း တစ်ကျမ်းကိုလည်း တိဗက်ဘာသာဖြင့် ပြန်ဆို၍ ယူဆောင်ခဲ့သည်။ ထို့နောက် မှတ်သားဖွယ်ကောင်းသည့် အချက်တစ်ချက်မှာ ဘုရင်ဂမ်ပိုက ဗုဒ္ဓဘာသာတရားတော်များမှ သုစရိုက်တရား ၁၀-ပါးကို အခြေခံလျက် နိုင်ငံတော်၏ ဥပဒေ တစ်ရပ်ကို ရေးဆွဲပြဋ္ဌာန်းစေခဲ့သည်။ လာဆာမြို့တော်တွင် ပိုတလာနန်းတော်နှင့် ရာမိုချေ (Ramoche) ကျောင်းတော်တို့ကိုလည်း တည်ဆောက်ခဲ့သည်။ ဘုရင် ဂမ်ပိုအနေဖြင့် ဗုဒ္ဓသာသနာထွန်းကားရေးကို အစွမ်းကုန် အားထုတ်ခဲ့သော်လည်း အစွဲလန်းကြီးသော ဘွန်းဘာသာဝင်တို့၏ ဆန့်ကျင်တိုက်ခိုက်မှုကြောင့် နှစ်ပေါင်း ၃၀၀-ကျော်ခန့်မှသာလျှင် အမြစ်တွယ်နိုင်ခဲ့သည်။

ဘုရင်ဂမ်ပို၏နောက် ငါးဆက်မြောက်ဖြစ်သော ဘုရင်ခရီစုန်ဒေစင်လက်ထက်တွင် အိန်္ဒိယပြည်၊ နာလန္ဒာတက္ကသိုလ်မှ ကျောင်းအုပ်ဆရာတော် အရှင်သန္တရက္ခိတကို တိဗက်သို့ ပင့်ဆောင်၍ သာသနာပြုစေခဲ့ သည်။ ထို့နောက် တန္တရ၀ါဒ၌ တစ်ဖက်ကမ်းခတ် တတ်မြောက်သော အရှင်ပဒုမသမ္ဘ၀မထေရ်သည်လည်း တိဗက်သို့ ကြွရောက်လာပြီး သာသနာပြုလေရာ စုန်း၊ ကဝေ၊ နတ်များကို နှိမ်နှင်းလျက် များစွာအောင်မြင်မှု ရရှိခဲ့လေသည်။ ထိုအချိန်မှစ၍ တိဗက်၌ မဟာယာန၏ ဂိုဏ်းကွဲတစ်ခုဖြစ်သော တန္တရဗုဒ္ဓဘာသာ ပြန့်ပွားခဲ့သည်။ ဤတန္တရဂိုဏ်းကို မန္တရဂိုဏ်း၊ ၀ဇီရယာနဂိုဏ်း ဟု လည်းခေါ်ပါသည်။

ဘုရင် ခရီဒေစုန်စင်၏ သားတော်ကြီး လန်ဒါးမားလက်ထက်၌ ဗုဒ္ဓဘာသာကို နှိပ်ကွပ်ခြင်းပြုခဲ့သော် လည်း နောက်ပိုင်းတွင် နန်းတက်သော ဘုရင်များကား ဗုဒ္ဓဘာသာကို အားပေးသောဘုရင်များသာ ဖြစ်ခဲ့ကြ သည်။ ခရစ်နှစ် ၁၁-ရာစုတွင် အိန်္ဒိယပြည် ၀ိက္ကမသီလတက္ကသိုလ် ကျောင်းအုပ်ဆရာတော် အရှင်ဒီပင်္ကရသီရိ ဉဏကို တိဗက်သို့ ပင့်ဆောင်၍ သာသနာပြုစေခဲ့ရာ ထူးခြားစွာ အောင်မြင်မှုရရှိခဲ့သည်။ ထိုဆရာတော်ကို တိဗက်တို့က အလွန်ရိုသေစွာ လေးစားကြပြီး “ အာစရိယ အတိဆာ ” ဟု ခေါ်ကြသည်။

နောက်ပိုင်းခေတ်များတွင် တိဗက်တို့ကိုးကွယ်သော တန်္တဂိုဏ်းမှ ဂိုဏ်းကြီး ငါးဂိုဏ်းကွဲထွက်ခဲ့သည်။ ၎င်းင်းတို့မှာ ---

၁။        ငြင်မဂိုဏ်း

၂။        ကဂျုဂိုဏ်း

၃။        သကျဂိုဏ်း

၎။        ကဒမ်ဂိုဏ်း

၅။        ဂေလုဂိုဏ်း တို့ဖြစ်လေသည်။

အထက်ပါဂိုဏ်း ငါးဂိုဏ်းအနက် ဂေလုဂိုဏ်းသည် နိုင်ငံရေးသြဇာရှိ၍ အရေးပါဆုံး ဂိုဏ်းဖြစ်သည်း။ ခရစ် ၁၇-ရာစုတွင် တိဗက်ဘုရင် စမ္ပကို မွန်ဂိုဘုရင် ၀ုသီရိခန်က နန်းချ၍ ဂေလုဂိုဏ်းမှ ပဉ္စမမြောက် ဒလိုင်း လားမားကို နန်းတင်ခဲ့ရာ ထိုအချိန်မှစ၍ တိဗက်နိုင်ငံ၌ ဒလိုင်းလားမားခေါ်သော ရဟန်းမင်းအဆက်ဆက်တို့က အုပ်ချုပ်ခဲ့ကြလေသည်။ တိဗက်ဘုန်းကြီးများကို “ လားမား ” ဟု ခေါ်သည်။ “ မြင့်မြတ်သူ ” ဟု အဓိပ္ပါယ်ရ သည်။ ၁၉၅၉-ခုနှစ်တွင် တရုတ်တို့ဝင်ရောက်လာသဖြင့် အိန္ဒိယသို့ တိမ်းရှောင်သွားရသော ဒလိုင်းလားမားမှာ ၁၄-ဆက်မြောက် ဒလိုင်းလားမားဖြစ်ပြီး ယခုအချိန်အထိ အိန်္ဒိယနိုင်ငံတွင် ခိုလှုံလျက်ရှိသည်။

ကမ္ဘာအရပ်ရပ်သို့ ဗုဒ္ဓသာသနာ ရောက်ရှိပြန့်ပွားပုံ ( ၁၁ )

မွန်ဂိုးလီးယား၌ ဗုဒ္ဓသာသနာ စတင်ပြန့်ပွားပုံ

မွန်ဂိုးလီးယားနိုင်ငံသည် တရုတ်ပြည်နှင့် ဆက်စပ်တည်ရှိနေသော နိုင်ငံဖြစ်၍ ခရစ်နှစ် ၄-ရာစုခန့်မှစ၍ ဗုဒ္ဓသာသနာနှင့် ထိတွေ့မှုရှိခဲ့သည်။ ၇-ရာစုသို့ ရောက်သောအခါ ဗုဒ္ဓဘာသာသည် နိုင်ငံအနှံ့ပြန့်လျက်ရှိနေပြီ ဖြစ်သည်။

သို့သော် ၁၄-ရာစုနောက်ပိုင်းတွင် တရုတ်ပြည်ကို မွန်ဂိုလူမျိုးတို့ အုပ်စိုးမှု အဆုံးသတ်သွားသောအခါ မွန်ဂိုးလီးယား၌ ဗုဒ္ဓဘာသာ တဖြည်းဖြည်း အားနည်းလာသည်။ ထို့နောက် ၁၇-ရာစုတွင် မွန်ဂိုလီးယားသို့ တိဗက် ဘုန်းကြီးများ ကြွလာသဖြင့် ဗုဒ္ဓသာသနာ ပြန်လည်အားရှိလာသည်။ မွန်ဂိုလူမျိုးတို့ကလည်း တိဗက် ဗုဒ္ဓဘာသာကို ပို၍နှစ်သက်စွာ ကိုးကွယ်ခဲ့ကြလေသည်။

ကမ္ဘာအရပ်ရပ်သို့ ဗုဒ္ဓသာသနာ ရောက်ရှိပြန့်ပွားပု ( ၁၂ )

နီပေါနိုင်ငံ၌ ဗုဒ္ဓသာသနာ စတင်ပြန့်ပွားပုံ

နီပေါနိုင်ငံသည် အိန်္ဒိယပြည်၏ မြောက်ဘက်၌ နယ်နိမိတ်ချင်း ဆက်စပ်တည်ရှိသော နိုင်ငံဖြစ်၏။ ဗုဒ္ဓရှင်တော်မြတ်၏ ခမည်းတော်၊ မယ်တော်တို့ နေထိုင်ရာ ကပိလ၀တ်ပြည်နှင့် ဘုရားလောင်းဖွားမြင်ရာ လုမ်္ဗိနီ ဥယာဉ်တို့သည် ယခုအခါ နီပေါနိုင်ငံအတွင်း၌ တည်ရှိကြသည်။ ဘုရားရှင်သည် ဘုရားအဖြစ်သို့ရောက်ရှိပြီး နောက် တစ်နှစ်မြောက်အချိန်တွင် ကပိလ၀တ်ပြည်သို့ကြွ၍ ခမည်းတော်ကြီးနှင့်တကွ ဆွေတော်မျိုးတော် တို့အား တရားရေအေး တိုက်ကျွေးတော်မူခဲ့သည်။ ထို့နောက်လည်း ကပိလ၀တ်ပြည်၊ နိဂြောဓာရုံကျောင်းတော် ၌ အခါအားလျော်စွာ သီတင်းသုံးနေတော်မူခဲ့သည်။ ဘုရားရှင် ပရိနိဗ္ဗာန်စံတော်မူသောအခါ ကပိလ၀တ်ပြည်မှ သာကီဝင်မင်းမျိုးတို့သည် ကုသိနာရုံပြည် မလ္လာမင်းတို့ထံမှ ဘုရားရှင်၏ ဓာတ်တော်ဝေစုကို တောင်းယူ၍ စေတီတော်တစ်ဆူ တည်ထားကိုးကွယ်ခဲ့သည် ဟု ဆိုသည်။ သို့သော် ကပိလ၀တ်ပြည်၌ နှစ်ပေါင်းမည်မျှကြာ အောင် သာသနာတော်တည်ရှိခဲ့သည်ကိုမူ မသိရချေ။

ခရစ်မပေါ်မီ နှစ်ပေါင်း ၃၀၀-ခန့်က ပါဋလိပုတ်ပြည်မှ အသောကမင်းကြီးသည် လုမ်္ဗိနီဒေသသို့ ကြွ သွားပြီး ဘုရားလောင်း ဖွားတော်မူခဲ့သောနေရာ၌ အထိမ်းအမှတ်ကျောက်တိုင် စိုက်ထူခဲ့ကြောင်း၊ သမီးတော်  စာရုမတီကိုလည်း အမတ်တစ်ဦးနှင့် ထိမ်းမြားလက်ထပ်ပေးခဲ့ရာ ထိုမင်းသမီးသည် နီပေါနိုင်ငံ၌ ကျောင်းကန် ဘုရားများစွာကို တည်ဆောက်ခဲ့ကြောင်း သိရှိရသည်။

နီပေါနိုင်ငံသည် ဟိမ၀န္တာတောင်တန်းနှင့်နီးသဖြင့် အအေးဓာတ်လွန်ကဲသော ဒေသဖြစ်သည်။ ထို့ ကြောင့် ခရစ်နှစ် အစောပိုင်းက ထိုနိုင်ငံ၌ နေထိုင်ကြသော သဗ်္ဗတ္ထိဝါဒဂိုဏ်းသားရဟန်းများသည် အအေးဒဏ် ကို ကာကွယ်ရန်အတွက် သင်္ကန်းနှင့်ပတ်သက်သော ၀ိနည်းဥပဒေများကို လျော့ပေါ့ကျင့်သုံးခဲ့ရသည် ဟု ဆို သည်။ ထို့ကြောင့် ထိုအချိန်တွင် နီပေါနိုင်ငံတွင် သဗ္ဗတ္ထိဝါဒဂိုဏ်းသာသနာ ပြန့်ပွားနေပြီ ဟု ယူဆရသည်။ အဘိဓမ္မာကောသကျမ်းပြု သဗ္ဗတ္ထိဝါဒဂိုဏ်းဆရာတစ်ဦးဖြစ်သော အရှင်ဝသုဗန္ဓုသည်လည်း ၄-ရာစုနှစ်များ အတွင်း နီပေါနိုင်ငံသို့ ကြွရောက်ခဲ့ကြောင်း သိရှိရပေသည်။

ခရစ်နှစ် ၇-ရာစုအတွင်းက နီပေါ၌ နန်းတက်သော ဘုရင်အံသုဝါမန်သည် ဗုဒ္ဓဘာသာဝင်တစ်ဦးဖြစ်ခဲ့ သည်။ ထိုဘုရင်သည် တိဗက်ဘုရင် စုန်စင်ဂမ်ပိုထံသို့ သမီးတော်ကို ဆက်သ၍ နှစ်နိုင်ငံ ရွှေလမ်းငွေလမ်းခင်း ခဲ့သည်။ ထိုအချိန်မှစ၍ နီပေါနိုင်ငံ၌ ဗုဒ္ဓသာသနာတော် နောက်တစ်ကြိမ် ပြန့်ပွားခဲ့ခြင်းဖြစ်သည်။

ခရစ်နှစ် ၁၁၉၈-ခုနှစ်တွင် တူရကီနိုင်ငံမှ အစ္စလာမ်ဘာသာဝင်တို့သည် အိန္ဒိယပြည်၊ ဗီဟာနယ်နှင့် ဘင်္ဂေါနယ်များသို့ ၀င်ရောက်လာကြပြီး ဗုဒ္ဓဘာသာအဆောက်အဦးများကို ဖျက်ဆီးခြင်း၊ ရဟန်းတော်များနှင့် ဗုဒ္ဓဘာသာဝင်များအား အစုလိုက်၊ အပြုံလိုက် နှိပ်စက်သတ်ဖြတ်ခြင်းများ ပြုလုပ်ခဲ့ကြသည်။ ထိုအခါ အချို့ သော ဗုဒ္ဓဘာသာဝင်ဘုန်းကြီးများသည် တန္တရရောနှောဗုဒ္ဓဘာသာကျမ်းဂန်များကို နိုင်သမျှသယ်ယူ၍ နီပေါ နိုင်ငံသို့ ခိုလှုံခဲ့ကြရသည်။ ထိုအချိန်မှစ၍ နီပေါနိုင်ငံတွင် တန္တရဗုဒ္ဓဘာသာ ထွန်းကားခဲ့လေသည်။

(ဆီကင်နိုင်ငံ၊ ဘူတန်နိုင်ငံတို့၌လည်း တိဗက်နိုင်ငံ၏ မဟာယာနဗုဒ္ဓဘာသာအရှိန်အ၀ါ လွှမ်းမိုးပြီး တန္တရဗုဒ္ဓဘာသာ ပြန့်ပွားခဲ့လေသည်။)

ယခုခေတ်တွင်မူ နီပေါ၌ ဟိန္ဒူဘာသာဝင်တို့က ပိုမိုအားကောင်းလျက်ရှိသည်။ သို့သော် ၁၉၂၀-ပြည့် နှစ်လွန်များမှစ၍ ကုသိနာရုံဆရာတော်ကြီး အရှင်စန္ဒြမဏိစသော မြန်မာပြည်မှဆရာတော်များ၊ နောက်ပိုင်းတွင် သီဟိုဠ်နှင့်ထိုင်းမှ ပံ့ပိုးမှုများနှင့် မဟာပရာဂယ (အရှင်မဟာပညာ) နှင့် ကုန်သည်ကြီး ဒသရထ (အရှင် ဓမ္မာလောက) စသော ဒေသခံနီပေါအမျိုးသား၊ အမျိုးသမီးများ၏ သက်စွန့်ဆံဖျား ကြိုးစားမှုများကြောင့် ယခု အခါ ထေရ၀ါဒဗုဒ္ဓဘာသာလည်း အရှိန်အဟုန်နှင့် ပြန့်ပွားနေပေသည်။

ကမ္ဘာအရပ်ရပ်သို့ ဗုဒ္ဓသာသနာ ရောက်ရှိပြန့်ပွားပုံ ( ၁၃)

ဗီယက်နိုင်ငံ၌ ဗုဒ္ဓသာသနာ စတင်ပြန့်ပွားပုံ

ဗီယက်နမ်နိုင်ငံကို ရှေးခေတ်က စမ္ပာဟူ၍လည်းကောင်း၊ အာနမ်ဟူ၍လည်းကောင်း ခေါ်တွင်ခဲ့သည်။ နေထိုင်ခဲ့သော လူမျိုးများမှာ ခမာလူမျိုးများ ဖြစ်သည်။

အိန္ဒိယပြည် အမရ၀တီခေတ်၌ ထုလုပ်သော ကြေးဆင်းတုတော်များကို ဗီယက်နမ်တွင် တွေ့ရှိခဲ့ရ သောကြောင့် ၃-ရာစု မတိုင်မီကပင် စမ္ပာနိုင်ငံသို့ ဗုဒ္ဓသာသနာ ရောက်ရှိနေပြီဟု ယူဆရသည်။ ၆-ရာစုနှစ် အကုန်တွင် စမ္ပာကို ၀င်ရောက်တိုက်ခိုက်ခဲ့သော တရုတ်တို့သည် ဗုဒ္ဓဘာသာအနုပညာ လက်ရာများစွာကို တွေ့ရှိခဲ့ရသည် ဟု ဆိုသည်။ ကျောက်စာများအဆိုအရ ၈-ရာစုနှစ်၌ ကုန်ကင်ပြည်နယ်မှ မဟာယာန ဗုဒ္ဓဘာသာဝင် တရုတ်များ စမ္ပာနိုင်ငံထဲသို့ ၀င်ရောက်ခဲ့ကြောင်း သိရသည်။ ထိုအချိန်မှစ၍ ဗီယက်နမ်၌ မဟာယာနဗုဒ္ဓဘာသာ စတင်ပြန့်ပွားခဲ့သည်။ ဈင်ဗုဒ္ဓဘာသာသည်ကား ဗီယက်နမ်နိုင်ငံသို့ ၆-ရာစုမှစ၍ ရောက်ရှိခဲ့သော်လည်း ပြန့်ပွားခြင်း မရှိခဲ့ပေ။ ၁၆-ရာစုတွင်မူ တဖြည်းဖြည်းပြန့်ပွားလာရာ ယခုအချိန်တွင် အင်အားကောင်းသော ဂိုဏ်းတစ်ဂိုဏ်း ဖြစ်လျက်ရှိပေသည်။

ယခုအခါ ဗီယက်နမ်နိုင်ငံ၌ ထေရ၀ါဒဗုဒ္ဓဘာသာသည်လည်း တစ်စတစ်စ ပြန့််ပွားလျက်ရှိကြောင်း၊ ထေရ၀ါဒဗုဒ္ဓဘာသာဝင်ဦးရေ တစ်သိန်းမျှရှိနေပြီ ဖြစ်ကြောင်း သိရှိရပါသည်။

ကမ္ဘာအရပ်ရပ်သို့ ဗုဒ္ဓသာသနာ ရောက်ရှိပြန့်ပွားပုံ ( ၁၄ )

မလေးရှားနိုင်ငံ၌ ဗုဒ္ဓသာသနာ စတင်ပြန့်ပွားပုံ

မလေးကျွန်းဆွယ်သည်လည်း ရှေးခေတ်က သုဝဏ္ဏဘူမိ ဟု ခေါ်သော ဒေသ၌ပါဝင်ကြောင်း အချို့ ပညာရှင်တို့က ယူဆကြသည်။ ထိုအယူအဆရဆိုချေသော် တတိယသံဂါယနာတင်ပွဲအပြီး သာသနာပြု ဒေသများအတွင်ပါဝင်သည်။ ထို့ကြောင့် သာသနာနှစ် ၂၅၀-ခန့်တွင် ထိုဒေသသို့ ဗုဒ္ဓသာသနာတော် စတင် ရောက်ရှိခဲ့သည် ဟု ဆိုရပေမည်။ သို့သော် ခိုင်လုံသော အထောက်အထားကား မရှိချေ။ ထိုဒေသကို သုဝဏ္ဏဒီပ ဟု လည်း ခေါ်ဆိုကြသည်။

ခိုင်လုံသောအထောက်အထားများအရမူ ခရစ်နှစ် ၄-ရာစုနှင့် ၅-ရာစုသုံး အိန္ဒိယအက္ခရာတို့ဖြင့် ရေးထိုး ထားသော သက္ကတဘာသာကျောက်စာတို့ကို မလေးကျွန်းဆွယ်အနှံ့အပြား၌ တွေ့ရှိရသည်။ ထိုကျောက်စာ တို့၌ ရေးထိုးထားသောစာများမှာ မဟာယာန မဇ္ဈိမိကဂိုဏ်း၏ အတွေးအခေါ်များဖြစ်ကြောင်း လေ့လာသိရှိရ သည်။ ထို့ကြောင့် ခရစ်နှစ် ၅-ရာစုခန့်ကပင် မလေးရှားကျွန်းဆွယ်၌ မဟာယာနဗုဒ္ဓဘာသာ ရောက်ရှိနေပြီ ဟု ယူဆရ သည်။

ခရစ်နှစ် ၇-ရာစု၌ ဆူမတြာကျွန်းတွင် သီရိဝိဇယနိုင်ငံသည် တန်ခိုးကြီးသော ဗုဒ္ဓဘာသာနိုင်ငံအဖြစ် ထင်ရှားခဲ့သည်။ မလေးကျွန်းဆွယ်သို့ပါရောက်ရှိခဲ့သော တရုတ်ခရီးသည် ရဟန်းတော် အိကျင်က ထိုနိုင်ငံ၌ ဗုဒ္ဓသာသနာ လွန်စွာထွန်းကား၍ အနီးဝန်းကျင်နိုင်ငံများသို့လည်း ဖြန့်ဖြူးနေကြောင်း၊ သဗ္ဗတ္ထိဝါဒထွန်းကား နေပြီး မဟာယာနလည်း အနည်းငယ်ရှိကြောင်း မှတ်တမ်းတင်ထားလေသည်။

ခရစ်နှစ် ၈-ရာစုတွင် သီရိဝိဇယနိုင်ငံကို အုပ်ချုပ်သော သေလေန္ဒြဘုရင်များသည် အိန္ဒိယပြည်မှ တန္တရ ဗုဒ္ဓဘာသာ ဗဟိုဌာနဖြစ်သော နာလန်္ဒတက္ကသိုလ်နှင့်လည်းကောင်း၊ တန်္တရဗုဒ္ဓဘာသာဝင် ပါလမင်းတို့၏ ၀ိက္ကမ သီလ၊ သြဒန္တပူရီ၊ ဂျဂဒ္ဒလတက္ကသိုလ်များနှင့်လည်းကောင်း ရင်းနှီးစွာ ဆက်ဆံမှုရှိခဲ့ကြသည်။ ပစ္စည်းလေးပါး ထောက်ပံ့မှုများပင် ရှိခဲ့သည်။ ထို့ကြောင့် သီရိဝိဇယနိုင်ငံအတွင်း၌ ပါဝင်သော မလေးကျွန်းဆွယ်၊ ဆူမတြာ၊ ဂျာဗားကျွန်းများသို့လည်း မဟာယာနဗုဒ္ဓဘာသာ ပြန့်ပွားခဲ့လေသည်။ ခရစ်နှစ် ၁၆-ရာစုတွင် အစ္စလာမ် စူလတန်ဘုရင်တို့က သီရိဝိဇယနိုင်ငံကို သိမ်းပိုက်လိုက်သောအခါ ထိုနိုင်ငံတော်၏ အစိတ်အပိုင်းဖြစ်သော မလေးကျွန်းဆွယ်သည်လည်း မူဆလင်တို့၏ လက်အောက်သို့ ကျရောက်သွားခဲ့ရသည်။ ထိုအချိန်မှစ၍ မလေးကျွန်းဆွယ်၌ ဗုဒ္ဓသာသနာကွယ်ပျောက်သလောက်နီးပါး ဖြစ်သွားခဲ့သည်။

မျက်မှောက်ခေတ်တွင်မူ မဟာယာနဗုဒ္ဓဘာသာဝင် တရုတ်နွယ်ဖွားများနှင့် ထေရ၀ါဒဗုဒ္ဓဘာသာဝင် အချို့၏ အားထုတ်မှုများကြောင့် ဗုဒ္ဓဘာသာတစ်စတစ်စ ပြန်လည်သက်ဝင် လှုပ်ရှားလာနေပေပြီ ဖြစ်သည်။ အထူးအားဖြင့် ပီနန်ကျွန်းတွင် မြန်မာ၊ သီရိလင်္ကာ၊ ထိုင်းဗုဒ္ဓဘာသာ ဘုန်းကြီးကျောင်းများ တည်ရှိနေကြပြီ ဖြစ်သည်။

ကမ္ဘာအရပ်ရပ်သို့ ဗုဒ္ဓသာသနာရောက်ရှိ ပြန့်ပွားပုံ ( ၁၅ )

အင်ဒိုနီးရှားနိုင်ငံ၌ ဗုဒ္ဓသာသနာ စတင်ပြန့်ပွားလာပုံ

သုတေသီပညာရှင်အချို့ယူဆကြသည့်အတိုင်း ဆူမတြာကျွန်းနှင့် မလေးကျွန်းဆွယ်တို့ကို သုဝဏ္ဏဘူမိ အဖြစ်သတ်မှတ်ကြလျင် အင်ဒိုနီးရှား၏ အစိတ်အပိုင်းဖြစ်သော ဆူမတြာသို့ ခရစ်မပေါ်မီ ၃-ရာစု၌ပင် ဗုဒ္ဓသာ သနာ စတင်ရောက်ရှိနေပေပြီ ဟု ယူဆရမည်ဖြစ်သည်။

ခရစ်နှစ် ၄၁၄-ခုနှစ်တွင် ဆူမတြာသို့ ရောက်ရှိခဲ့သော တရုတ်ရဟန်းတော် ဖာဟီယန်ကမူ ဆူမတြာ၌ ဗြာဟ္မဏဘာသာ ပြန့်ပွားလျက်ရှိကြောင်း၊ ဗုဒ္ဓဘာသာကို အနည်းငယ်မျှသာ တွေ့ရကြောင်း မှတ်တမ်းတင်ခဲ့ လေသည်။ သို့သော် ဖာဟီယန်နောက် နှစ်ပေါင်း ၂၀-ခန့်အကြာတွင် အိန္ဒိယပြည်မှ ဘုန်းတော်ကြီး ဂုဏ၀ါမန် သည် ဆူမတြာသို့ ကြွရောက်၍ ဗုဒ္ဓဘာသာတရားတော်များကို ဟောကြားဖြန့်ဖြူးခဲ့သည်။ ထိုအချိန်မှစ၍ ဆူမတြာ၌ မဟာယာနဗုဒ္ဓဘာသာ အမြစ်တွယ်ခဲ့လေသည်။

ကျောက်စာများအဆိုအရ ခရစ်နှစ် ၇-ရာစုကုန်ခါနီးတွင် နန်းတက်သော သီရိဝိဇယဘုရင်သည် ဗုဒ္ဓ ဘာသာကို လွန်စွာအားပေးချီးမြှောက်ခဲ့ကြောင်း ၊ ထိုအချိန်က မဟာယာနတန္တရဗုဒ္ဓဘာသာ လွန်စွာထွန်းကား ပြီး သံဃာတစ်ထောင်ကျော်နှင့် ဘုရားကျောင်းကန်များ များစွာရှိခဲ့ကြောင်း သိရှိရပါသည်။ ထိုခေတ်တွင် ကြီးမားခမ်းနားသော ဗောရောဗုဓုစေတီတော်ကြီးနှင့် မန်ဒွတ်စသော စေတီများကို တည်ထားခဲ့သည်။ ဂျာဗား၊ ဘာလီ စသော အခြားကျွန်းများသို့လည်း ဗုဒ္ဓဘာသာပြန့်နှံ့သွားခဲ့သည်။

ခရစ်နှစ် ၁၃-ရာစုမှ ၁၅-ရာစုအတွင်း အင်ဒိုနီးရှား၌ ဗုဒ္ဓဘာသာနှင့် ဟိန္ဒူဘာသာနှစ်မျိုးကို ရောနှောကိုး ကွယ်ခဲ့ကြသည်။ ခရစ်နှစ် ၁၆-ရာစုတွင်မူ အစ္စလာမ်ဘာသာဝင် စူလတန်ဘုရင်များ ၀င်ရောက်သိမ်းပိုက်သည့် အချိန်မှစ၍ အင်ဒိုနီးရှား၌ မလေးရှားနီးတူ ဗုဒ္ဓဘာသာကွယ်လုနီးပါး ဖြစ်ခဲ့ရသည်။ ဟိန္ဒူဘာသာကမူ ဘာလီ ကျွန်း၌ ဆက်လက်ရှင်သန်လျှက်ရှိသည်။

မျက်မှောက်ခေတ်တွင် ဗုဒ္ဓဘာသာဝင် တရုတ်လူမျိုးများ တစ်စတစ်စ ၀င်ရောက်လာမှုကြောင့် ဗုဒ္ဓ ဘာသာ၏ သက်ဝင်လှုပ်ရှားမှုများ အသင့်အတင့်ရှိလာခဲ့သည်။ လွန်ခဲ့သောနှစ်ပေါင်း ၃၀-ခန့်က မြန်မာနိုင်ငံမှ မဟာစည်ဆရာတော် အရှင်သောဘဏသည် အင်ဒိုနီးရှားသို့ သာသနာပြုခရီး ကြွရောက်ဖူးသည်။ ယနေ့ အင်ဒိုနီးရှား လူဦးရေး သန်း ၂၀၀-ကျော်အနက် ဗုဒ္ဓဘာသာဝင် ဦးရေ ၁၀-သန်းခန့် ရှိနေပြီ ဖြစ်ကြောင်း သိရှိ ရသည်။

ကမ္ဘာအရပ်ရပ်သို့ ဗုဒ္ဓသာသနာ ရောက်ရှိပြန့်ပွားပုံ ( ၁၆ )

အနောက်နိုင်ငံများ၌ ဗုဒ္ဓသာသနာ စတင်ပြန့်ပွားပုံ

အင်္ဂလန်နိုင်ငံအပါအ၀င် အနောက်နိုင်ငံများသို့ ဗုဒ္ဓသာသနာ ရောက်ရှိပုံမှာ အရှေ့နိုင်ငံများသို့ ရောက် ရှိပုံနှင့် မတူပေ။ ဘုရင်အသောကကဲ့သို့သော သာသနာပြုစေလွှတ်သည့် မင်းလည်းမရှိခဲ့ပေ။ အရှေ့နိုင်ငံများမှ ကုန်သည်များ၊ ရဟန်းတော်များကလည်း ရောက်ရှိအောင် မဆောင်ရွက်ခဲ့ပေ။ စင်စစ် ခရစ်ယာန်ဘာဝင်တို့ ကိုယ်တိုင်ပင် ဗုဒ္ဓသာသနာတော်ကို မိမိတို့နိုင်ငံများသို့ သယ်ဆောင်ခဲ့ကြခြင်း ဖြစ်ပါသည်။

အနောက်နိုင်ငံသားများသည် ၁၆-ရာစု ခန့်ကပင် အရှေ့နိုင်ငံများသို့ နယ်ချဲ့ခဲ့ကြသည်။ ရှေးဦးစွာ ပေါ် တူဂီ ( ဒပ်ခ်ျ )၊ စပိန်တို့အားကောင်းခဲ့ကြပြီး နောက်ပိုင်းတွင် အင်္ဂလိပ်၊ ပြင်သစ်၊ ဂျာမဏီတို့ အင်အားကြီးမား ခဲ့ကြသည်။ အနောက်နိုင်ငံသားတို့သည် စူးစမ်းလိုစိတ်ဖြင့် ကမ္ဘာအရပ်ရပ်လှည့်လည်ကြရင်း ကုန်သွယ်မှုများ ပြုလုပ်ခဲ့ကြသည်။ မိမိတို့တွေ့ကြုံရသည့် ခရီးသွားအတွေ့အကြုံများကိုလည်း သက်ဆိုင်ရာ မိခင်နိုင်ငံသို့ အစီ ရင်ခံကြလေ့ရှိကြသည်။ အစီရင်ခံစာအရ အခြေနေပေးသည်နှင့် နောက်ကစစ်တပ်လိုက်လာပြီး နိုင်ငံများကို သိမ်းပိုက်လိုက်ကြသည်။

စစ်နိုင်သော အနောက်နိုင်ငံသားတို့သည် ရွှေ၊ ငွေစသည့် အဖိုးတန်ပစ္စည်းများ၊ ကြေးစည်၊ ခေါင်းလောင်း၊ ပေပုရပိုက်စသော ဗုဒ္ဓဘာသာနှင့်စပ်သော ယဉ်ကျေးမှုအမွေအနှစ်ပစ္စည်းများကိုလည်း သယ် ဆောင်ခဲ့ကြသည်။ ထိုပစ္စည်းတို့ကို ၎င်းတို့၏ နေအိမ်များ၊ ပြတိုက်များ၊ စာကြည့်တိုက်များနှင့် တက္ကသိုလ်များ တွင် အရှေ့တိုင်းယဉ်ကျေးမှုအမွေအနှစ်များအဖြစ် ထိန်းသိမ်းထားတတ်ကြသည်။ အဆိုပါ ပစ္စည်းများထဲမှ ဗုဒ္ဓရုပ်ပွာတော်များနှင့် ပေပုရပိုက်များကို တွေ့မြင်ပြီး စိတ်ဝင်တစားလေ့လာရသောအခါ မိမိတို့မသိသေးသော အရှေ့တိုင်း၏ ဘာသာတရားဖြစ်ကြောင်း စတင်မိတ်ဆက်၊ သိရှိလာရသည်။

ထိုကဲ့သို့ စိတ်ဝင်တစားလေ့လာကြရင်း နောက်ပိုင်းတွင် တက္ကသိုလ်များက “ အိန်္ဒိယပြည်ဆိုင်ရာ ယဉ် ကျေးမှုအနုပညာစာပေဘာသာရပ် ( Indology ) ” ဟူသော ဌာနထောင်၍ လေ့လာကြသည်။ ထိုမှတဖန် ထိုဌာနကိုပင် ချဲ့ထွင်၍ “ အရှေ့နိုင်ငံများဆိုင်ရာ ယဉ်ကျေးမှုအနုပညာဘာသာရပ် ( Orientology ) ” အဖြစ် တိုးချဲ့လေ့လာကြပြီး ယခုအခါတွင် အနောက်နိုင်ငံများရှိ တက္ကသိုလ်ကြီးများတိုင်းတွင် “ ဗုဒ္ဓဘာသာ လေ့လာရေး (Buddhist Study ) ” ဌာနများ သီးခြားဖွင့်လှစ်သင်ကြာနေကြပြီ ဟု လည်းသိရှိရသည်။ အရှေ့တိုင်းယဉ်ကျေးမှုအနုပညာနှင့် ဗုဒ္ဓဘာသာလေ့လာမှုတွင် ဂျာမဏီတက္ကသိုလ်များသည် အတက်ကြွဆုံး ဖြစ်ကြသည်။

ထိုတက္ကသိုလ်များ၏ကျေးဇူးနှင့် အခြားပညာရှင်များ၏ ကြိုးပမ်းမှုကြောင့် ယခုအခါတွင် ဗုဒ္ဓဘာသာကို ဥရောပနိုင်ငံများတွင် သာမကတော့ဘဲ အမေရိကနိုင်ငံများအထိ စိတ်ဝင်တစား လေ့လာနေပြီး အောလ်ကော့၊ အက်ဒွက်အာနိုး၊ အရှင်အာနန္ဒာမေတ္တေယျ၊ ဘိက်္ခုသီလာစာရ၊ မစ္စ်ရိုက်ဒေးဗစ် (ပါဠိဒေ၀ီ) စသော အနောက် နိုင်ငံသား သာသနာပြုသူရဲကောင်း မြောက်များစွာ ပေါ်ထွက်ခဲ့ပြီးဖြစ်ပါသည်။

အနောက်နိုင်ငံရောက် ဗုဒ္ဓဘာသာတွင် ထေရ၀ါဒဗုဒ္ဓဘာသာထက် မဟာယာနဗုဒ္ဓဘာသာက ပိုမိုအား ကောင်းစွာ ရောက်ရှိသာသနာပြုနေပြီး ထေရ၀ါဒဗုဒ္ဓဘာသာနိုင်ငံရဟန်းတော်များအတွင်းမှ သီရိလင်္ကာရဟန်း တော်များက ဦးဆောင် သာသနာပြုနေကြပါသည်။

( ဘိက္ခုသကျလောက )

မှီငြမ်း။    ။ ဗုဒ္ဓဒေသနာ ပြန့်ပွားရေးပညာဌာန ပို့ချချက်များ

နိုင်ငံတော် ပရိယတ္တိသာသနာ့တက္ကသိုလ် ( ရန်ကုန် )နှင့် အခြားစာစုများ။

ကမ္ဘာအရပ်ရပ်သို့ ဗုဒ္ဓသာသနာ ပြန့်ပွားပုံ (အပိုင်း ၁) ကို ဖတ်ရန်  Link