သူငယ်ချင်းဆိုတာ

တစ်စုံတစ်ယောက် ဆင်းရဲဒုက္ခကြုံနေရတဲ့အခါ အားပေးမှုပြုပါ။ ကောင်းပါတယ်။

ပိုပြီးကောင်းတာကတော့ သူနဲ့အတူ ဆင်းရဲဒုက္ခကို ဝေမျှခံစားလိုက်ခြင်းပါ။

တစ်ခါတုန်းကပေါ့။ ပူပြင်းလွန်းတဲ့နေရောင်ခြည်အောက်မှာ တစ်ယောက်နဲ့တစ်ယောက် လေးလေးစားစားနဲ့ ခင်မင်ကြတဲ့ သူငယ်ချင်းနှစ်ယောက်လမ်းလျှောက်လာကြတယ်။ သူတို့ခြေထောက်အောက်က ကတ္တရာလမ်းမကြီးက နေရောင်ခြည် ကြောင့် ပူခြစ်ပြီး အရည်ပျော်လုမတတ်ဖြစ်နေပြီ။ သူတို့ နင်းလိုက်တိုင်း ပျော့စိစိနဲ့ ခြိုင့်ဝင်သွားမလားအောက်မေ့ရတယ်။ အဲသည်လိုလျှောက်လာကြရင်းနဲ့ တစ်ယောက်ရဲ့ဖိနပ်ဟာ ပြတ်သွားတယ်။ ဒါနဲ့ သူတို့ခဏနားကြပြီး ပြတ်သွားတဲ့ ဖိနပ်လေးကို ပြင်ကြတယ်။ ပြင်စရာပစ္စည်းကိရိယာကအစုံအလင်မရှိဘူးဆိုတော့ ဖြစ်သလိုပြင်လိုက်တဲ့ ဖိနပ်လေးဟာ သိပ်ဝေးဝေးမလျှောက်ရခင်မှာပဲ ထပ်ပြတ်ပြန်တာပေါ့။ ဒီတော့ ဖိနပ်ပြတ်တဲ့တစ်ယောက်က လမ်းလျှောက် ရတာအခက်တွေ့သွားပြီ။ ပြတ်နေတဲ့တစ်ဖက်ကို တရွတ်တိုက်ဆွဲပြီးလျှောက်ပေမယ့်လည်း အဆင်မပြေဘူး။ ခရီးမတွင်ဘူး။ အဆိုးဆုံးကတော့ ခြေတစ်ဖက်လေဖြတ်သွားသလို တောင့်တောင့်တန်းတန်းကြီးနဲ့လျှောက်နေရတာပဲ။ နောက်ဆုံးတော့ သူလက်လျှော့လိုက်တယ်။ ပြတ်သွားတဲ့ ဖိနပ်ကလေးတစ်ဘက်ကို ကောင်းနေတဲ့တစ်ဘက်နဲ့ အတူယှဉ်ပြီး လမ်းဘေးတစ်နေရာမှာ စွန့်ထားခဲ့ရတော့တယ်။ ဒီအခါမှာ ခြေဗလာဖြစ်သွားတဲ့ သူငယ်ချင်းကိုကြည့်ပြီး ကျန်တဲ့သူငယ်ချင်းက သူ့ရဲ့ဖိနပ်အကောင်းကိုယူစီးဖို့ပြောလာတယ်။ နေကလည်း ကျဲကျဲတောက်ပူနေပြီး၊ လမ်းမကလည်း တရှိန်ရှိန်တောက်လောင်နေတဲ့ ကတ္တရာတွေနဲ့။ ဒါပေမယ့် ဖိနပ်ပြတ်သွားတဲ့သူငယ်ချင်းက လက်မခံဘူး။ သူဘာကြောင့် ငြင်းတာလဲဆိုတာကို သူတို့နှစ်ယောက်လုံး အချင်းချင်းသိကြပါတယ်။ ဒီတော့ တစ်ဘက်စီ စီးကြဖို့ပြောပြန်တယ်။ သူတို့နှစ်ယောက် တစ်ယောက်တစ်ဖက်စီးသွားလို့ ဘာထူးမှာလဲလို့ ခြေဗလာနဲ့သူငယ်ချင်းက အပြုံးလေးနဲ့ငြင်းပြန်တယ်။ ဒီတော့ ဖိနပ်စီးထားတဲ့သူငယ်ချင်းက အသာအယာပဲ သူ့ဖိနပ်လေးကိုချွတ်ပြီး လက်နဲ့ကိုင်လိုက်တယ်။ ပြီးတော့ သူကပြောသေးရဲ့။ သူငယ်ချင်းဆိုတာ ဆိုးအတူကောင်းအတူ၊ ဝေမျှရင်ဆိုင်သင့်တယ်တဲ့။

နေက တစ်ရှိန်ရှိန်ပူပြင်းနေတယ်။ လမ်းမမှာ အပူရဲ့အငွေ့တံလျပ်တွေကတစ်ရိပ်ရိပ်။ ကတ္တရာတွေက ပျော့စိစိ။ သူငယ်ချင်းနှစ်ယောက်ကတော့ ရင်ထဲမှာ အေးမြတဲ့မေတ္တာတွေကိုယ်စီနဲ့ တစ်လှမ်းခြင်းလျှောက်နေကြတယ်။ စကားလုံးတွေအများကြီးမလိုပါဘူး။ ဒီလိုမျိုး ဒုက္ခကိုမျှဝေခံစားပေးလိုက်တဲ့အပြုအမူလေးတစ်ခုဟာ ခင်မင်မှု၊ သစ္စာရှိမှု နဲ့ မိတ်ဆွေကောင်းရဲ့ ရဲဘော်ရဲဘက်စိတ်ကို ကျယ်ကျယ်ပြန့်ပြန့်လှစ်ဟပြသွားတာပါ။

သူငယ်ချင်းရေ …

ဒီအဖြစ်အပျက်လေးကနေ ငါသိလိုက်ရတာကတော့ နှုတ်ဖျားကနေ စာနာသနားမှုကိုဖော်ပြတာထက်၊ အားပေးနှစ်သိမ့်မှုကို တစ်ဖွဖွပေးရတာထက် အခုလိုမျှဝေခံစားလိုက်ရတာဟာ ဘာနဲ့မှမတူတဲ့ အားအင်တွေ၊ ကြည်နူးမှုတွေကိုပေးတယ် ဆိုတာပါပဲ။ အတူတူပေါ့ ဆိုတဲ့ငါတို့ပြောနေကျစကားလေးတစ်ခွန်းရှိတယ်လေ။ တစ်ယောက်က ပျော်ရွှင်ရယ်မော နေချိန်မှာ လိုက်ပါပြီးပျော်ရွှင်ရယ်မောပေးလိုက်တာဟာ ကောင်းတဲ့အလုပ်ဖြစ်သလို၊ တစ်ခါတစ်ရံမှာ တစ်ယောက်က ၀မ်းနည်းငိုကြွေးနေတဲ့အခါ နှစ်သိမ့်မှုပေးတဲ့အပြင် လိုက်ပါပြီးငိုကြွေးပေးလိုက်တာဟာလည်း အတိုင်းအတာတစ်ခုထိသက်ရောက်မှုရှိပါတယ်။

သူငယ်ချင်းရေ … ငါ့ကိုရောင့်တက်တယ်တော့မပြောပါနဲ့ကွာ။ တစ်ခွန်းလောက်တော့ထပ်ပြောလိုက်ချင်သေးလို့ပါ။ ငတ်မွတ်နေတဲ့သူတစ်ယောက်ကို ခြွေတာရေးတရားဟောတာဟာ သူ့ကိုစော်ကားတာနဲ့တူတူပဲ။ သူလိုအပ်နေတာ ခြွေတာရေးတရားမဟုတ်ဘူး။ အစာရေစာနဲ့နွေးထွေးလုံခြုံမှုပဲတဲ့။ ငါဖတ်ခဲ့ရဖူးတဲ့စာသားလေးတစ်ခုပေါ့ကွာ။ အဲသည့်လိုပဲ တစ်ချို့ဖြစ်ရပ်တွေမှာလည်း နှစ်သိမ့်အားပေးစကားမဟုတ်ဘဲ မျှဝေခံစားခြင်းကို လိုအပ်ပါတယ်သူငယ်ချင်း။

နီဟိန်းအောင်